Serekê Meclîsî Numan Kurtulmuşî û Hemserekanê DEM Partî eşkerayîya hempare ya çapemenîye daye. Kurtulmuşî vat: ‘’Seba ke Tirkîya de dewrêko newe dest pêbikero ganî no firsendo tarîxî bêro şuxilnayene.’’
Serekê Meclîsî Numan Kurtulmuşî Gruba Meclîsî ya DEM Partî zîyaret kerde. Zîyaret de Hemserekê DEM Partî Tulaye Hatîmogullari û Tuncer Bakirhan, Serekwekîlê Gruba DEM Partî Sezaî Temellî û Gulîstane Kiliç Koçyîgît amade bîyî.
Dima Serekê Meclîsî Numan Kurtulmuşî û Hemserekanê DEM Partî eşkerayîya hempare ya çapemenîye daye.
Tulaye Hatîmogullari pare kerd ke pêvînayîş de Vengdayîşê Rayber Apoyî, proseso newe, erkê Meclîsî yê seba prosesî, awankerdişê komîsyonêkî ameyê ercnayene.
Numan Kurtulmuşî zî îfade kerd ke pêvînayîş bi hawayêkê pozîtîfî qewimîyayo û vat: ‘’Homayî ra şikir ke eşkerayîyanê Îmraliyî û çekverdayîşê rêxistine kerd ke hinî mesele Meclîs de bêra qiseykerdene. Ma armanc kenê ke naye ser o Meclîs de komîsyonêk awan bikerê. Ma do partîyanê bînan zî zîyaret bikerê û na babete rojdem bikerê. Seba ke Tirkîya de dewrêko newe dest pêbikero ganî no firsendo tarîxî bêro şuxilnayene.’’
