Qezaya Bazîdî ya Agirî de bi waştişê kurdkî rê statuyo fermî û perwerdeyê ziwanê dayîke ver bi Tirbeya Ehmedê Xanîyî rayraşîyayîşo girseyî ame kerdene. 

Wan, Qers, Mûş, Erzirom, Bedlîs û Îdirî ra kesê ke Bazîd de ameyî têhet bi pankartanê  “Zimanê azad, bi civaka azad pêk tê” û “Statûya Kurdî, perwerdehiya bi Kurdî” rayraşîyayîş kerd. Şarî bi tîlîlî û çapikan paştî daye ci. Rayraşîyayîş Qesrê Îshak Paşayî ra heta Tirbeya Ehmedê Xanî dewam kerd. 

Hemvervatoxê Komîsyonê Ziwan û Kulturî yê DEM Partî Heval Dilbaharê ke verê tirbe de qisey kerd, bale ante xoverdayîşê ke semedê kurdkî ame dayene ser û vat: “Polîtîkayê çînkerdişê kurdkî ser nêkewtî. Wayîrvejîyayîşê ziwanê wayAîrvejîyayîşê pêro merdimîye yo. Eke qala haştîyêke yena kerdene wa polîtîkayê tecrîdî yê sere Birêz Ocalanî û kurdkî bêro wedaritene.” 

Waştişê semedê kurdkî wina ameyî rêzkerdene:

- Wa kurdkî bibo wayîrê statuyê fermî,

- Wa kurdkî bibo ziwanê perwerdeyî,

- Wa nameyê kurdkî bêrê îadekerdene,

- Wa Qanûnê Bingeyî de ziwan, kultur û coğrafyaya kurdan bêrê naskerdene

Pêro keyeyî gerek bibê sey mektebî

Eşkerayîye de semedê şarê kurdî nê vengdayîşî ameyî kerdene: “Pêro şarê kurdî û dezgehanê ci rê vengdayîşê ma yo; wa derheqê ziwanî de xebatî bêrê xurtkerdene. Wa şarê kurdî dormeyê ziwanê xo de bibo yew. Eke kurdkî werte ra wedarîyo şarê kurdî zî werte ra wedarîyeno. Pêro keyeyî wa biaçarîye mektebî. Kurdkî têna erjê şarê kurdî nîya, erjê pêro merdimîye ya.”

Çalakîye bi slogananê “Bijî zimanê Kurdî” qedîyaye.