Hunermende Nudeme Durak seba ke deyîrê kurdkî vatî 2015 de Şirnex de ameye tepiştene û di dewayanê cîya cîyayan ra cezaya zîndanî ya 19 serran dîyaye ci. 

Nudeme Durak bado ke zîndananê Amed, Mêrdîn Bayburtî de mende Zîndanê Erzînganî rê ameye sewqkerdene. Rewşa weşîye ya Nudeme Durak çend şino xirabe bena. Nudeme Duraka ke nêweşîye ci yê sey Graves (guatiro axûyin) û heliyayîşê esteyan est ê, hem Kurdîstan de hem zî teberê welatî de hunermandan semedê serbestverdayîşê ci kampanyayî organîze kerdî.

Dayîka ci Hatîce Durak qala rewşa weşîye ya Nudeme Durak kerd. Hatîce Durak vat kênaya ci semedê vengê xo ameye tepiştene û nika wextê tedewî de risk est o ke a vengê xo bi temamî vînî bikero. Dayîke Hatîce Durak vat pîya bi zîndanî nêweşxane  de zî îxmalê girdî yenê ciwîyayene coka rewşa kênaya ci xirabêre bena. Hatîce Durak vat seba ke kênaya ci bajarê dûrî de yena tepiştene wextê pêvînayîşî zî semedê înan sey îşkenceyî yo veng da wa pêro tepişteyê nêweşî bêrê veradayene.”