Endamê Konseya Rayberdişî ya KCKyî Zubeyîr Aydarî ANFyî rê proseso newe û qewimîyayîşê ci ercnayî.

Ercnayîşê Aydarî wina yê:

‘’Vengdayîşê Haştîye û Komelê Demokratîkî yê Rayber Apoyî zaf veng vet. Dima zî xora PKKyî kongre arê daye û birê xo eşkera kerdî. PKKyî mîsyonê xo ard ca. Ma do bivînê ke dewrê neweyî de rêxistinîyêka senîne do bêra kerdene.

Haştîye bi yew terefî nêna caardene. Rayber Apoyî zî PKKyî zî çîyêk kerd. Ganî hinî hukmat game bierzo. Îqtîdarê AKP-MHPyî 8 mengan ra nata gamêke zî nêeşte. Hema zî tecrîdê vera Rayber Apoyî dewam keno. Tena bi rayîrê DEM Partî tayê dîyalog û zîyaretî est ê. Vanê ke Meclîs de komîsyonêk ganî bêro awankerdene. Ma paştî danê nê waştişî. La ganî Rayber Apo bieşko ke her kes de bi rehetî têkilîyêke virazo.

Ancî ma pawenê ke Qanûnê Bingeyîyî de heqê kurdan bêrê pawitene. Komîsyonê Meclîsî seba nê waştişan ganî bixebito. Eke qalê way û biratîye yeno kerdene o çax ganî bi têdûştî dewlete nêzdîyê kurdan biba. La seke ma hê xapîyenê. Ganî no nêbo, ganî samîmîyet bêro mojnayene.

Çareserîya meseleya kurdan bi demokrasî do mumkîn biba. La ma vînenê ke kerdişê antîdemokratîkî yê vera CHPyî est ê. Xora nê operasyonê sîyasî yê. Ma nê operasyonan şermezar kenê. Hetê bînî ra kerdişê vera kurdan zî dewam kenê. Qeyûmî hema dewre de  yê.

Her qewimîyayîşê Vakurê Kurdîstanî tesîrê Rojawanê Kurdîstanî keno. Ganî Sûrîyeya demokratîke bêra awankerdene. La lîderê hukmatê Sûrîye Colanî qalê demokrasîyî nêkeno. Serebûtê Sûrîye do tesîrê Tirkîya bikerê. Paradîgmaya rayber Apoyî ganî pêro herême de bêra nimûnekerdene. 

Awankerdişê komelê demokratîkî zaf girîng o. PKKyî xo fesh kerd. No destpêkêko newe yo. La no nêno a mana ke kurdî do bêrêxistin bimanê. PKKyî 52 serran bedelê pîlî dayî. PKK naye ra pey zî do têkoşîn bikero la no têkoşîn seba awankerdişê komelê demokratîkî bibo. Kurdî zî ganî yewîya xo bîyarê ca, seba awankerdişê komelê demokratîkî têbigêrê.’’