Festîvala Kulturê Dêrsimî ya Ewropa ya 15. bi slogana " Ma ne Xorasan, ma ne Tunceli! Ma Dersim me " bajarê Frankfurtî yê Almanya de Rebstockpark de dest pêkerde.

Festîvale emser bi waştişê vera asîmîlasyonî xoverdayîş, afirnayîşê erjanê kulturî, pawitişê vîrê tarîxî, hêzdarkerdişê paştdayîşê komelkî ameye organîzekerdene. Warê festîvele de fotografê Seyîd Riza û kadroyanê ronayoxan ê PKKyî ra Alî Haydar Kaytan û Riza Altunî ameyî daliqnayene.

Panelê akerdişî: Qirkerdişê ziwan, kultur û bawerî

Festivale bi panelê “ Qirkerdişê ziwan, kultur û bawerî, Rojhelatê Mîyanênî, Kurdî û Elewîyî ” ameyî akerdene. Panelo ke Hulya Yer moderatorîya ci kerde Serekwekîla Grûba DEM Partî Gulîstane Kiliç Koçyîgît, SMFyî ra Huseyîn Şîmşek û cigêrayox-nuştox Selîm Temo tewrê ci bîyî.

Gulîstane Kiliç Koçyîgît bale ante Terteleyê Dêrsimî yê 1938î ser û vat xeylê wext nê dejî nêameyî qiseykerdene la hinî şar raştîya xo de ame têrî û no rehet nîyo la proseso bianor o. Gulîstane Kiliç Koçyîgît prosesê çareserîye yê verênî yê Tirkîya vist vîrî û vat semedê haştîye gerek gamê pêtî bêrê eştene.

Huseyîn Şîmşekî ard ziwan ke Terteleyê Dêrsimî hetê heme partîyanê sîyasîyan ra ame kerdene û vat şarî badê qirkerdişî kulturê xo pawit û cuyeyêka dewlete ra dûrî naye ro.

Badê panelî hunermend Kivrem Erdal Timurlenk vejîyaye sehne. Warê festivale de standê nuştoxan, werdê herêmî, pêramotişê kulturî û kedê destan ca girewt.

Programê roja diyîne ya festivale:

Festivale roja diyîne de do saete 11.00 de dest pê bikero. Verî do panelêk bêro kerdene. Saete 13.00 de bigulbangî do programê sehnî dest pê bikero. Performansê muzîkî, pêramotişî, atolyeyê domanan, kayê herêmî do bêrê kerdene.

Çar Newa, Grup Munzur, Beser Şahîn, Cemîl Koçgîrî, Zarokên Tenburxane, Zaza Woman, Diyar 23, Hazaran, Delîl Hidir û DAKME do vejîye sehneyî ser.

Reyna do parlamenteri, hemşaredarî û temsîlkarê Dêrsimî yê ke Ewropa de yê do tewrê vestîvale bibê.