Paketa Mehkeme ya 10ine bê ke pawitişê rayaumûmîye û DEM Partî bigêra verê çiman pêşkêşê Serekîya Meclîsî ameye kerdene. Endamanê Komîsyonê Edaletî ra Wekîla DEM Partî Dîlane Kunt Ayan derheqê babete de ajansê ma rê qisey kerd.

Dîlane vist vîrî ke Rayber Apoyî vatibi ke ‘Çekverdayîş bêguman sereraştkerdişanê huqûqîyan reyde manadar bibo.’ Dîlane vat: ‘’No ferz keno ke Tirkîya de qanûnê antî-demokratîkî ganî cade bêrê vurnayene û qanûnê demokratîkî û têdûştî bikewê pratîkî. Qanûnê înfazî nika verê çareserîya meseleya kurdan de asteng o. Paketa ke ameya pêşkêşkerdene zî goreyê waştişanê ma nîya.

Paketa newîye de sereraştkerdişê tepişteyanê nêweşan de kêmasîyî est ê. Êyê ke cezaya muebede dîyaya înan bi hawayêkê cîyayî yenê ercnayene ke no goreyê krîterê têdûştîye û ruhê prosesî nîyo. Qanûnê Covidî zî pakete de çin a. Ma îfade kerd ke tîya de têdûştîye çin a. Qanûnê înfazî qetî goreyê wextê dîyarkerdişê bire nêameyî kerdene, goreyê wextê sûcî yenê kerdene. Tîya de zî sereraştkerdişî nêameyî kerdene. Qanûnê Covidî de tepişteyê sîyasîyî teber de ameybî verdayene. Ma waşt ke no bêro vurnayene la nêame vurnayene.

Nê qanûnî de sereraştkerdişê xoserî est ê ke seba tepişteyanê edlîyan pozîtîf ê la hetê têdûştkerdişê qanûnê înfazî ra pozîtîf nîyo.. Ganî TMK-17 bi temamî wedarîyo.

Vanê beno ke menganê êlule û teşrîna verêne de sereraştkerdişê neweyî bêrê kerdene. Ma raşt nêvînenê ke prosesê qanûnê înfazî erey bêro caardene. Ma wazenê ke cade gamê zelalî bierzîyê. Mîyanê nê gaman de çira cîyakerîye yena kerdene? Ma vînenê ke proses de yeno vilakerdene. Eke na pakete de gamê serê tepişteyanê sîyasîyan est bê, nê do bibê nîşaneya prosesî. Coka ganî gamî erey nêerzîyê.’’