Îstanbul, Anqara û Îzmîr de semedê paştdayîşê tepişteyanê nêweşan çalakîyî ameyî kerdene.

Komîsyonê Zîndanan ê Şubeyê Komeleya Heqanê Merdiman a Îstanbulî  çalakîya xo ya Roniştişê Fyî ya 508. Banê komele yê Taksîmî de kerde. Çalakîya nê hewteyî bale ameye antene serê tepişteyê nêweşî Azîz Tufanî yo ke Zîndanê Amedî de yo. Çalakîye de şehadetê Garîbe Gezer,Abdurezzak Şuyur, Halîl Guneş û Îlyas Demîrî yê ke dewro peyên de zîndan de dinyaya xo bedilnaye ameyî vîrardene û ame vatene ke wa hînî zîndanî ra cenazayî mevejîyê. Eşkerayîye de derheqê rewşa girane ya Tufanî de zanayîş ame dayene û ame waştene ke Tufan û pêro nêweşî bêrê veradayene.

Komîsyonê Zîndanan ê Şubeyê Komeleya Heqanê Merdiman a Îzmîrî zî çalakîya xo ya nê hewteyî de bale ante tepişteyê nêweşî Mehmet Emîn Ozkanî ser.  Eşkerayîye de merdimanê tepişteyanêê nêweşan ke zîndanan de dinyaya xo bedilnaye rê serweşîye ameye waştene û  ame vatene ke ganî komel hîsgêr bo û hukmat berpirsîyarîya xo bîyaro ca ke hinî cenazayî zîndanan ra mevejîyê. Çalakîye de bale ameye antene binpaykerdişê heqanê merdiman ê zîndanî ser û ame vatene ke eke verê nê zextan mero girewtene do mergan ra îqtîdar û Wezîrîya Edaletî mesuldar bo.

Anqara de zî Înîsîyatîfê Tepişteyanê Nêweşan rê Azadîye rê hewteyê 380. de Komeleya Heqanê Merdiman de eşkerîye daye. Çalakîye de rewşa tepişteyê nêweşî Yusuf Ozmenî yo ke Zîndanê Erziromî de yo gerîyaye dest. Eşkerayîye de şehadetê tepişteyanê ke rojanê peyênan de zîndan qewimîya ser û ame vatene ke sey Ozmenî yo ke nêweşê kanserî yo, nêweşê xidarî yê ke têna nêeşkenê miqatê xo bî û rixmo ke raporê înan ê nêeşenê zîndan de bimanê  estê, şertanê zehmetan de yenê tepiştene. Eşkerayîye de ame vatene ke heqê cuye yê tepişteyan yenê binpaykerdene û semedê wayîrvejîyayîşê tepişteyan ame vengdayene.