Aktîvîstanê Têgêrayîşê Ciwanan ê Şorişgêran (TCŞ) û Cinîyan ê Ciwanan ê Têkoşeran (TÊKO-JIN) çarçewa Hemleya 'Werin Cengê Azadîye' de xeylêk şaristanan de çalakîyê cîya-cîyayî kerdî.

Paytextê Fransa Parisî de ciwanan pê pankartanê 'Werin Cenga Azadiyê', 'Rayberê Şarê Kurdî rê Azadîye' û flamayanê PKKyî çalakîya rayraşîyayîşî kerde. Komêka bîne ya ciwanan de îstasyonê trenan ê Parisî de rayîrê qereqolî girewt û sloganê sey 'Ocalanî rê Azadîye', 'Bê Serek cuye nêbena' û 'Biciwîyo Serek Apo' vatî.

Şaristanê Bordeauxî yê Fransa de ciwanan seba azadîya Rayberê Şarê Kurdî Abdullah Ocalanî mîtîngêk kerd û eşkerayîye daye. Ciwanan eşkerayîye de pare kerd ke ê têkoşîn de qerardar ê û venga pêro ciwanan da ke vera hêrişan vejîyê meydanan.

Şaristanê Marsilya yê Fransa de ciwanan serê bînayêka berze de bi meşaleyan çalakîyêke kerde. Ciwanan posterê Rayberê Şarê Kurdî û alaya PKKyî akerde, meşaleyî vistî ta û sloganê 'Biciwîyo Serek Apo', 'Bê serek cuye nêbena' qîrayî.

Şaristanê Lozanî yê Swîsre de aktîvîstanê TCŞ û TÊKO-JIN standêk akerd û bale ante tecrîdê vera Abdullah Ocalanî ser. Ciwanan derheqê tecrîdî de agahîyî dayî dormeyî û azadîya Ocalanî waşte. Çalakîye pê vilakerdişê vilawekan qedîyaye.

Paytextê Îngilîstanî London de ciwanan şaristan de afîşî daliqnayî û bale ante hêrişanê vera Herêmanê Pawitişî yê Medya ser. Ciwanan afîşî bînaya Lockheet Martinî de zî daliqnayî ke jetan roşena Tirkîya.