Sereka Şaxa Anqeara ya Komeleya Heqanê Merdiman Nuraye Çevîrmen dîyar kerd ke tayê hepisxaneyan de hezê caardişî yê sey 12ê Êlule yenê tetbîqkerdene. 

Çevîrmene  ANFyî rê qisey kerd  ke heqê merdiman yenê destsernayene û vat: “Hepisxaneyê Tîpê Fyî yê Boluyî de aşmêke de tena reyê hepisîyan benê rewîrî. Rewşêka lezgîne zî biba înan nêbenê rewîrî. Taye nêweşî estê ke ganî doktorî bi hawayêkê peryodîkî înan rê dermanan binusê la înan nêbenê rewîrî. Hepsîyo ke nameyê xo Nurullah Semo yo, astengdar o û no 2 serro yew hucre de tena bi sereyê xo maneno. Na yewe teberê qanunî de ya. Şîdeto fîzîkî zî ey rê ameyo kerdene.” 

Çevîrmene dîyar kerd ke bi Peymana Heqanê Merdiman ê Ewrupa merdiman rê îşkence ameyo qedexekerdene û vat: “Îşkence merdiman rê nêeşkeno bêro kerdene. Hepisxaneyê Sîncanî de 8 kesî ameyê kuyayene. Kovar û rojnameyê ke înan ser o bira aredayîşî çin a nêdayînê  hepsîyan. Rojnameya Yenî Yaşamî taye hepisxaneyan de nêdanê hepsîyan. Demo ke kovare bi kargoyî hepsîyan rê yena erşawitene zî îdareyê hepisxaneyî dîyar keno ke kargo nêameyo.

Hapisxaneyê Tokatî de hezê caardişî yê 12ê Êlule yenê tetbîqkerdene. Hasan Ortaçî zî ÎHD rê mektubêke erşawita û dîyar keno ke 5ê tebaxe re bîyo hûmaritişê serê payan înan rê yeno ferzkerdene û her roj înan rê tehqîqetî yenê akerdene. Bi cezaya komînîkasyonî keyeyan reyde yewbîndîyayîş, hepsîyan rê ameyo astengkerdene. Hûmara herînayîşê kitaban ameya kêmkerdene.