Çewlîg de Newroze warê Nêweşxaneyê Dewlete de bi coşî ameye fîrazkerdene. Hemwelatîyî bi kincanê neteweyîyan tewrê şayîye bîyî. Hemserekê DBPyî Çîgdeme Kiliçgun Uçar zî tewra şayîye bîye. Girseyî tim sloganê sey “Bijî Serok Apo” û “Bê Serok jiyan nabe” berz kerdî.

Newroze de hêverî Wekîlê DEM Partî yê Çewlîgî Omer Faruk Hulakuyî qisey kerd û vat ke Newroza emserîne Newroza haştî û azadîye ya. Hulakuyî vat: ‘’Birêz Ocalanî seba pêro şarê kurdî û şaran veng da. Seba ke mesuldarîya xo bîyarê ca ma do têkoşîn bikerê.’’

Dima Çîgdem Kiliçgun Uçar adirê Newroze vist ta. Şarî bi deyîranê Ozleme Baglayan govende girewte.

Çîgdeme dima xîtabê şarî kerd û vat: ‘’Birêz Ocalanî 27ê sibate de vengdayîşê Haştîye û Komelê Demokratîkî kerd. No vengdayîş seba îradeyê hemparî yo. Ma dî ke Rojawan de se bi. Rojawan de şaran pîya manîfestoyê xo nuşt. Kurdan qetî polîtîkayê şerî nêşinasnayî. Çew hinî nêeşkeno verê şarê kurdî bigêro.

Ma do adirê azadîye qetî hewna nêkerê.Ganî tecrîdê Îmraliyî bêro wedaritene. Huqûqo ke şar û nasnameyanê nê welatî nêşinasneno mecbûr o ke xo bivurno. Ganî îqtîdar hinî gaman bierzo. Ganî Newroze biba wesîleya azadîye. ‘’

Şayîye bi govende û sloganan qedîyaye.