Çewlîg de çarçewa Kampanyaya 'Wexte azadîye'' de hetê Kongraya Komelê Demokratîkî (KCD)  û Partîya Herêman ê Demokratîkan (DBP) ra têhetameyîşê şarî ame organîzekerdene. Kombîyayîşo ke Rêxitina HDPyî ya Bajarî de ame kerdene Hemserekê Pêroyî yê KCDyî Berdan Ozturk, Hemserekê Pêroyî yê DBPyî Keskîn Bayindir, Parlamenterê HDPyî yê Çewlîgî Erdal Aydemîr û xeylêk hemwelatîyî tewrê ci bîyî.

Kombîyayîş de verî Keskîn Bayindirî qisey kerd. Bayindirî vist vîrî ke îqtîdarêTirkîya kontorolê xo vînî kerdo û vat: ''Dewlete seba ke meseleya kurdî çareser nêkerd kewt krîzê xorî. Coka hêraşê partîya ma kenê. Têna vera ma ney vera heme destkewtenê kurdan hêrişê xo xurtêr kerdî. Vera nê hêrişan partîyê ma yê sîyasîyî û heme dezgehê ma sereberz payra yê. Pê planê çokdayîşî waşt ke rêxistinbîyayîşê ma çîn bikerê. La ewro şarê kurdî û dezgehê ci payra yê. Êyê ke rijîyayî, çok danê AKP û MHP bi xo yê. HDP hinî eşkeno ameyoxê welatî bewlî bikero. Ma têna îqtîdarî nêrijnenê. Hêzê ma naye ra wertêr o. Dewleta ke meseleya kurdî çareser nêkerd peynîya xo arde. Eke dewlete wazena xo bîyaro pêser ganî na mesela çareser bikero. Eke nêkero do peynîya ci xirabêr bo. Prosseso ke ma tede yê muhîm o, averşîyayîşê sîyasîyî yê neweyî qewimîyenê. Coka ganî ma zî pîya bi şarê xo rêxistinkede têkoşînê xo pîlêr bikerê. Ma eşkera vanê ma çirey îtîfaqanê cumhur û mîletî rê çim nêşiknenê. Xeta ma eşkera Rayîro Hîrêyin o. Ma do pîya bi şarê nê rayîr de qerardar aver şirê.''

Berdan Ozturk zî bale ante polîtîkaya qirkerdişî yê vera kurdan ser û vat:  ''Qirkerdiş têna fîzîkî nîyo, bi tewiranê cîyayan yeno kerdene. Pê Qanûnê Bingeyî ziwan, tarîx, kultur û îradeyê şarêkî hedef yeno girewtene û planê çînkerdişê ci yenê kerdene. No Qirkerdişo sipî yo ke qirkerdişo tewr bêehleq û bêwîjdan o. No qirkerdiş 98 serrî yo kurdîstan de vera kurdan yeno kerdene. Başûr de hêrişê îşxalî yenê kerdene. No îşxal o. Wa nameyê ci mebidilnê û şarî mexapînê. No têna problemê Başûrî ney problemê çar leteyan o. Destekwteyê Başûrê Kurdîstanî destkewteyê heme kurdan ê. Heme kurdî wayîrê destkewteyan vejîyenê û vera hêrişan nêrazîbîyayîş mojnenê. Ma zaf bedelî dayî. Enfal de doman cinî nêvat pê çekanê kîmyewîyan qetil kerdî. Nika zîhnîyeto ke Saddamî ra xirabêr o Başûrê Kurdîstanî de çekanê kîmyewîyan şuxulneno. Çîyo winayên nîno qebulkerdene. Pêkerdişanê mîyanneteweyî yenê binpaykerdene. Sûcê merdîye yeno kerdene la çew/e vengê xo nêvejeno. Dirîye mekerê. Kurdan rê çiman û goşan xo nêqefilnê. Ganî dezgehê eleqedarî şirê herême de cigêrayîş bikerê. Seba ke Birêz Ocalanî hêvîya şaran o tecrîd yeno xorî kerdene. Heta ke tecrîd nêro şiktene Tirkîya de krîzî nêeşekenê bêrê çareserkerdene. Muxalafeto ke vera tecrîdî bêveng o wa bizano ke heta qala tecrîdî nêro kerdene qala demokrasîyî nêbena.''