Îstanbul, Dêsim û xeylêk bajaranê bînan ê Kurdîstan û Tirkîya de serrgêra qirkerdişanê Gazî,Umrîyane Qamişlo, Gazî, Halepçe û Beyazitî de çalakîyê vîardişî ameyî kerdene.

Îstanbul de hetê  Keyeyanê Şehîdan ê Gazî-Umraniye, Platformê 12ê Adare û dezgehanê elewîyan ra Taxa Gazî de vîardişêk ame organîzekerdene. Her hetê Îstanbulî ra bi hezaran kesan verê xo da Gazî. Vîardiş binê ablûqaya polîsan de ame kerdene. Merdimanê 12 kesan ê ke Qirkerdiş Gazî de dinyaya xo bedilnaye sefanê verênan de cayê xo girewt. Wekîlê HDPyî Musa Pîroglu û xeylêk temsîlkarê partîyanê sîyasîyan û dezgehanê komelê sîvîlî tewrê ci bîyî. Vîrardiş de qirkerdişî ameyî lanetkerdene û kiştoxê ke zelal ê muhakemekerdişê înan ame waştene. Rayraşîyayîş de sloganê se şehîdê şorişî bêmerg ê dewleta kiştoxe do hesab bido ameyî eştene. Goristan de dayîkan lawikî eştî domananê xo ser. Badê rêzgirewtişî eşkerayîye ameye wendene.

Waya Zeynebe Poyraza ke qirkerdiş de dinyaya xo bedilnaye Kîbare Poyraz eşkerayîye wende. Poyraze vat: ''Ewro reyna zerrîya ma pê dej û hêrsî pîrkerde ya. Pê nê qirkerdişî pêkwtişê mabanê sûnî û elewîyan ame waştene.  Şarê Gazî xora xerîbê nê hêrişan nîyo. Zext û toror qet serê şarê Gazî de kêm nêbi. Şarê Gazî musayeyê nê hêrişan la musayîş nîno manaya qebulkerdişî.  No hêrsê ma zaf keno. Qiştoxê dest gonînan waşt şaran biverdê yewbînan. La şarê Gazî mesele zaf hole zanayene. Eslê xo de çîyo ke ameyêne waştene verê muxalefetê şorişgêrî yê Gazî girewtişbi. Qirkerdişo ke humetê dewrî berpirsîyarê ci yo de kiştoxî ameyî pawetene. Dewa sey xapînayîşî ameye kerdene. Êyê ke vera qirkerdiş û zextan vejîyene yenê tepştene û raştê tecrîdê giranî yen.  Ewro welat reyna binê tecrîdî de yo. Zîndanî açarnayî keyeyanê mergî.  Heqê ziwanê dayîke yê kurdan destî ra yeno girewtene û temsîlkarê ci yê sîyasîyî zîndanan de sey rehînan yenê tepiştene. Pê qeyûman îradeyê kurdan çîn hesibîya. Polîtîkayê asîmîlasyonî dewam kenê. Cînayetê cinîyan zêdîyayî. Mekteban de dersa dînîya mecburîye yena dayene. Bêhuqîya tewr girde yena kerdene.''

Şar dima ra ver bi qewexaneyê ke raştê hêrişî ameyî rayra şi û tîya vilîkî nayî ro.  Badê eşkerayîye şar şi Gorsitanê Gazî êyê ke dinyaya xo bedilnaye ardî vîrî. Vîrardiş bado ke Cemxaneyê Gazî de loqme ame vilakerdene qedîya.

Dêrsim de zî hetê Platformê Kede  Demokrasîyî ra eşkerayîye ameye dayene. Eşkerayîye de ame vatene ke talîmatê qirkerdişî hetê hukmatê dewrî ra ame dayene û herinda muhakemekerdişê înan de ameyî dîyarî dîyaye înan. Têkoşînê azadîye yê şarê ma do nê tarîxê dejinî bibedilno. Rayna Wan, Şirnex û xeylêk cayanê bînan de zî biwesîleya serrgêra qirkerdişanê Qamişlo, Gazî, Halepçe û Beyazitî  vîrardişî ameyî kerdene û êyê ke ameyî qetilkerdene ameyî vîardene û polîtîkayê hêrişakarî ameyî şermezarkerdene.