Federasyonê Komeleyanê Wanî vizêr Esenyurtê Îstanbulî de Heyetê Pêroyî yê xo yê 6. organîze kerd. Wekîlê  AKPyî Îrfan Kartalê ke tîya qisey kerd û vat ''Meseleya kurdî çîn a meseleya terorî esta'' raştê nêrazîbîyayîşan ame.

Hemşaredarê Wanî Mustafa Avciyî vera Kartalî hêrsê xo ard ziwan û vat: ''Êyê ke semedê şeref û namûsê xo têkoşîn kenê çew nêeşkeno înan rê vajo terorîst. Wa her kes hedê xo bizano. Êyê ke têkoşînê nê şarî nas nêkene, no şar zî înan nas nêkeno.'' Qiseykerdişê Avciyî bi çapik û tîlîlîyan ame wayîrvejîyayenê. Naye ser o Kartal mebûr mend ke  heyetî caverdo.

Rêxistina HDPyî ya Wanî hesabê xo yê medyaya sanale ra da zanayene ke Wekîlê AKP Îrfan Kartal seba ke vato ''Meseleya kurdî çîn a'' hetê wanijan ra ameyo protestokerdene û vat ê do mesela tewr esasî ya şarê xo û heqanê xo bipawê.