Emîne Şenyaşara ke 2 laj û mêrdeyê ci hetê merdimanê Wekîlê AKPyî Îbrahîm Halîl Yildizî ra kişîyayî lajê xo Ferît Şenyaşarî reyde 123 rojî yo verê Edlîyeya Riha de nobeta edaletî kena. 

Ewro îdareyê neweyî yê Baroyê Riha Keyeyê Şenyaşarî zîyaret kerd. Avûkatê keyeyî Hîdayet Emenek, Serhat Kurt zî tewrê heyetê Baroyî bîyî.

 Dima ke Gokhan Dayikî derheqê dosyaya dewa de zanayîşî dayî Ferît Şenyaşarî qala binpaykerdişanê heqanê vera înan kerde. Şenyaşarî vat: ''Ma şîyî hetê dozgerê neweyî. La ey ma goşdarî nêkerdî. Ma tira randevu wazenê. Tîya de yew sûcê merdimîye esto. Dozgerê verênî tesbît kerd ke 23 kesî tewrê nê qirkerdişî bîyî la o wezîfe ra ame girewtene. Şima ma têna meverdê. Ma venga serekanê 80 baroyan danê. Rêxistinê huqûqî do nê edaletî bîyarê ca.''

Serekê neweyî yê Baroyê Riha Mehmet Velet Îzolî zî vat ke ê do waştişê edaletî rê dewam bikerê û serdozgerî ra randevu bigêrê. Îzolî vat: ''Ma hetê Keyeyê Şenyaşarî de yê.'' 

Avûkatanê keyeyî ra Hîdayet Emenekî zî da zanayene ke keyeyî verî zî verê bînaya AKPyî de nobeta edaletî kerdêne la polîsan mudaxeleyê keyeyî kerd û vat: ''Mengêke verî 10 serekanê baroyî Keyeyê Şenyaşarî zîyaret kerd. Avûkat Osman Şah Yildizî nê serekan rê heqaret kerd la îdareyê verênî yê baroyî derheqê Yildizî de çîyêk nêkerd. Reyna baroyo verên tewrê roniştişanê verênan nêbi. Semedo ke nê çîyî reyna nêqewimîyê ganî îdareyo newe hetê ma de bibo.''