Îdareyê Zîtanê Tîpê Fyî yê Bolu de yo ke tim bi binpaykerdişê heqan ê tepişten rojdem de yo, heqê dayîş-girewtişê xeberan ê tepişte Îhsan Balkaşî bi hewayêkê keyfî yeno astengkerdene.

Mektubê Balakî yê ke bi ziwanê xo yê dayîke kurdkî nuşte, hetê îdareyî ra bi îdîaya nîno famkerdene nêameyî şawitene. Reyna îdareyî semedê mektuban pereyê açarnayîşî waşt.

Avûkatanê OHDyî ra Bêrîvane Barina ke Îhsan Balkaşî dir pêvînayîş kerd, na rewşe sey binpaykerdişê heqanê dayîş-girewtişê xeberan hesibnaye û bale ante ser ke na  rewşe açarîyaya mekanîzmaya sansurî.

Bêrîvane Barin no caardiş sey binpaykerdişê heqan name kerd û wina vat: ''Na rewşe heqê tepişteyan yê kurdkî dayîş-girewtişê xeberan fîîlen keno bêîmkan.Tepişteyê ke rewşa înan a ekonomîkî xirab a heqê înan ê dayîş-girewtişê xeberan bi temamî destê înan ra yeno girewtene. Dewlete selahîyetê xo yê kontrolkerdişê dayîş-girewtişê xeberan açarnayo mekanîzmaya sansurî. Tepişteyê ke destur nêdîyeno bi ziwanê xo yê dayîke binusê, hetê nasname û anorî ra raştê muameleyê xirabî yenê. Têna heqê dayîş-girewtişê xeberan nê gerek anorê merdimîye zî bêro pawitene.''

Bêrîvane Barin  wina dewam kerd: ''Heqê dayîş-girewtişê xeberan heqo bingeyî yo. Îdareyê zîndanî bi waştişê pereyê açarnayîşî yê semedê fax û metubanê kurdkî, heqê cueyeya taybete û mîyankerdişê dayîş-girewtişê xeberan o ke bi madeyê 20. yê Qanûnê Bingeyî gerîyayo binê temînatî, binpay keno.''

Balkaşo ke metubê ci nêameyî şawitene derheqê binpaykerdişê heqan de Dadgerîya Înfazî ya 2. ya Bolu rê îtîraz kerd la îtîrazê ci hetê Mehkemeya Cezaya Girane ya 1. ya Bolu ra ameyî redkerdene. Badê nê qerarî avûkatan muracatê Mehkemeya Qanûnê Bingeyî kerd.