Komeleya Heqanê Merdiman (ÎHD) 30 bajaran de semedê tepişteyanê nêweşan Nobata 'Ma Cuye Pawenê' daye destpêkerdene. Çalakîyî do heta saete 21:00î dewam bikerê.

Anqara de bi tewrbîyayîşê Hemserekê Pêroyî yê ÎHDyî Ozturk Turkdogan û Wekîlê HDPyî Omer Faruk Gergerlîogluyî nobete dîyaye destpêkerdene. Tukdoganî ard ziwan ke seba ke bale binancê rewşa tepişteyanê nêweşan û binpaykerdişê heqan ê tepişteyan ser nobeta rojêke daye destpêkerdene û vat do çalakî û aktîvîteyê înan dewam bikerê. Turkdoganî vat: ''Tirkîya de vera tepişteyan polîtîkayê cîya cîyayî yenê caardene. Sîstemê Însafî çîyêko raşt nîyo. Pê xoverdayîşê tepişteyan sîstemê înfazî yê 19ê Kanûne amebi rijnayene la nika o sîstem newe ra dewam keno.  Bi destpêkerdişê tecrîdê Îmraliyî zîndanî açarîyayî tabutan.''

Gergerlîogluyî zî vat: ''Reyapêroyî de hîsgêrîye çîn a. Merdimî zîndanan de mirênê, raştê neheqîye yenê la komel qet nêgeno rojdemê xo. Qismêkê medya nêvînayîşî ra yeno. Vera tepişteyan huqûqê dişmenîye yeno caardene. Vano 'mirenî wa bimirî mi rê çi.'  Gama ke çalakîye dewam kerdêne kombîyayîşê çapemenîye ame kerdene. Endama Heyetê Rayberdişê Merkezî yê ÎHDyî Nuraye Çevîrmen vat: ''Ganî înfazê tepişteyanê nêweşan bêro peydeeştene ke ê teberê zîndanan de bêrê dermankerdene. Ma semedê tepişteyanê nêweşan merhamet, însaf nê edalet wazenê.''

Şûbeyê ÎHDyî yê Amedî de zî semedê azadîya tepişteyanê nêweşan Nobeta 'Ma Cuye Pawenê' dîyaye destpêkerdene. Wekîlê HDPyî Dersim Dag û Pero Dindar, Hemserekê HDPyî yê Amedî Zeyat Ceylan û Gulîstane Atasoy, merdimê tepişteyanê ke Baroyê Amedî de Nobeta Edaletî tepişenê û xeylêk kesî tewrê çalakîye bîyî. Heyeta çalakîye de fotografê Halîl Guneş, Celal Şeker, Abdulrezzak Şuyur, Mehmet Alî Çelebî, Vedat Erkmen û Garîbe Gezer înanê ke zîndan de dinyaya xo bedilnaye ameyî daliqnayene. Hemserekê Komîsyonê Zîndanan a ÎHDyî Ercan Yilmazî semedê wayîrvejîyayîşê tepişteyanê nêweşan veng da.

Reyna Mêrdîn, Wan,Colemêrg, Êlih, Riha,Meletî,Gumgum, Îzmîr, Adana, Antalya, Hatay, Mersin û xeylêk bajaranê bînan ê Kurdîstan û Tirkîya de  Nobeta 'Ma Cuye Pawenê' dîyaye destpêkerdene. Çalakîyan de semedê paştdayîşê tepişteyanê nêweşan veng dîyeno komelî û hukmatî ra yeno waştene ke wa bêhuqûqîya vera tepişteyan caverdo û înan cade serbest veradî.