Komeleya Heqanê Merdiman (ÎHD) bi waştişê heyetêkî bişawo Îmrali muracatê Wezîrîya Edaletî ya Tirkî kerd.

ÎHDyî waştişnameyê xo de ard ziwan ke Rayberê PKKyî Abdullah Ocalan û Hamili Yildirim, Omer Hayri Konar  û Veysî Aktaş yê ke Zîndanê Îmrali de yenê tepiştene nizdê hîrê serran o ke înan ra xebere nîna girewtene û vat seba ke pêvînayîşê avûkatan û keyeyan yeno astengkerdene înan rê zaf muracatî ameyî kerdene.

Waştişname de nê ameyî vatene: ''Hukmerdeyê ke Îmrali de yê binê tecrîdê giranî de yê. Coka ganî heyetêko xoser înan zîyaret bikero. Reyna xeylêk zîndanan ra tepişteyan ma rê bi mektuban da zanayene ke înan vera tecrîdê Îmraliyî dest pê grevê vêşanîye kerdo.

Komeleya ma  ke vera neheqîye heqanê merdiman pawena wazena ke wa cade caardişê tecrîdî bêro wedaritene. Tecrîd heqanê merdiman binpay keno û goreyê huqûqê Tirkîya û pêkerdişanê dezgehanê huqûqî yê Ewropa zî xelet o. Coka ma wazenê heyetêkê xoserî bişawê Îmrali. Ma  wazenê hetê ÎHDyî ra heyetêk bişawê Zîndanê Îmaliyî û wazenê wa semedê nê destur bêro dayene.''