Nameyê tepişteyane PKK û PAJKî Denîz Kayayî bi eşkerayîye da zanayene ke ê do bi grevê vêşanîye yê bidorî tewrê Hemleya 'Abdullah Ocalanî rê Azadîye, Meseleya Kurdan rê Çareserîye' bibê.

Eşkerayîye wina ya:

''Ma Hemleya 'Abdullah Ocalanî rê Azadîye, Meseleya Kurdan rê Çareserîye' selam kenê ke 10ê Teşrîna Verêne de dîyabî destpêkerdene.

Tewr peyêne 3 serrî verî ma Rayber Apoyî ra xebere girewtbî. Tecrîdo mutleq 25 serrî yo dewam keno. Konseptê şerî yê 2015î bi tecrîdê mutleqî yê Îmraliyî dest pêkerdbi. Raştîya Îmraliyî hetê îtîfaqêkê mîyanneteweyîyî ra ame afernayene û yeno caardene. Coka Komployo Mîyanneteweyî bi tecrîdê Îmraliyî dewam keno.

Fikrê Konfederalîzmê Demokratîkî yê Rayber Apoyî fîkrîyat û hêvîya newe ra awankerdişê cuye yê. Tecrîdê Îmraliyî şexsê Rayber Apoyî de vera pêro şaran û alternatîfê cuyêka newîye yeno caardene.  Rayber Apo zaneno ke krîz û meseleyanê sey yê kurdan çareser bikero û ey emrê xo zî da ney. Ey mîyanê tecrîdê giranî de zî tim perpektîf û rayîrê çareserîye eşkera kerdî. Rayber Apoyî azadîye, têdûştîye, edalet û demokrasî tim pawitî. Coka o raştê nê hêrişan yeno. Sozê ey ê şorişî Rojawan û Şingal de ame caardene û ewro pêro dinya rê fikrê ci vila benê.

Çareserîya meseleya kurdan û azadîya Rayber Apoyî heman çî yê. Coka nameyê na hemle Hemleya 'Abdullah Ocalanî rê Azadîye, Meseleya Kurdan rê Çareserîye' ya. Îqtîdarê AKP-MHPyî bi hêrişanê xo gerîlayan rê û tepişteyan rê teslîmîyet ferz keno. Ma sey tepişteyanê dewaya PKK û PAJKî ma her roje tecrîdî hîs kenê. La ma do tim bi pratîk û kerdişanê xo xîret kenê ke bibê layîqê Rayber Apoyî. 

Coka ma do hêverî mabênê tarîxanê 27ê teşrîna peyêne û 15ê sibate de bi grevê vêşanîye yê bidorî tewrê Hemleya 'Abdullah Ocalanî rê Azadîye, Meseleya Kurdan rê Çareserîye' bibê. Her zîndan de embazê ma planê hûmara kome û çalakîya grevî dîyar bikerê. Embazê ma yê kokim û nêweşî û êyê ke cezayê înan di serrî mendî do tewrê çalakîye nêbê. Hetê bînî ra çarçewa çalakîya xo de ma do dezgehan, rêxistinanê komelê mîyanneteweyî, partîyanê sîyasîyan û temsîlkaran rê mektuban bişawê. Ma do Wezîrîya Edaletî ra bi waştişnameyan biwazê ke Îmraliyî rê bêrê sewqkerdene. Na çarçewe de ma CPTyî rê zî do mektuban bişawê. Ma do mehkemeyan de sîstemê tecrîdî teşhîr bikerê. Ganî pêro embazî goreyê bernameyê grevî têbigêrê û bi hawayêkê şexsîyî tênêgêrê. Ma venga pêro keyeyanê xo, şarê ma, dormeyanê demokratîk û şorişgêran, dostanê xo danê ke tewrê Hemleya 'Abdullah Ocalanî rê Azadîye, Meseleya Kurdan rê Çareserîye' vejîyê.

Ma bi na wesîle serrgêra 45. ya ronîyayîşê PKKyî zî fîraz kenê. Ma Rayber Apoyî bi hîsê perwerî selam kenê. Ma şehîdanê xo bi rêz û minetî yad kenê. Ma soz danê ke têkoşînê xo bi serkewtişî tacîdar bikerê. Ma pêro şarê xo û embazanê xo yê waranê têkoşînî selam kenê. Wa serrgêra ronîyayîşê partîya ma fîraz ba.

Ma bi şîarê 'Şarê Azadî, Neteweya Demokratîke' rayaumûmîya demokratîke selam kenê û heskerdişê xo pêşkêş kenê.''