PKK vengdayîşê Rayber Apoyî ser siba do Silêmanî de merasîmê çekeronayîşî organîze bikero. Heyetê ke semedê tewrbîyayîşê merasîmî bajaranê cîya cîyayan ê Kurdîstan û Tirkîya ra kewtî rayîr, qezaya Cizîre ya Şirnexî de ameyî têhet.

Hemserekê Pêroyî yê DEM Partî Tuncer Bakirhan û Tulaye Hatimogullari, Hemserekê Pêroyî yê DBPyî Çîgdeme Kiliçgun Uçar û Keskîn Bayindir, Hemserekê Pêroyî yê OHDyî Ekin Yeter û  Serhat Çakmak, endamê Meclîsê Dayîkanê Haştîye û wekîlê DEM Partî zî tede nizdê 150 kesî heyetê de ca genê.

Têhetameyîşê Cizîre de Tuncer Bakirhanî cewab da persanê rojnamegeran. Bakirhanî nê vatî: ''Heyecanê ma gird o. Semedê qedînayîşê  prosesê pêkewtiş û şîdetî gama muhîme yena eştene. No proses hem tarîxî hem zî qiymetîn o. Ma pêro do nê rê şahîdîye bikerê. No averşîyayîş do tarîxî rê bêro nuştene. No destpêkerdişêk o û berpirsîyarîya ma pêrune gird a. Eke ma berpirsîyarîya xo bîyarê ca, ma hinî tabûtanê ciwanan nê, haştîye doşê xo de kirişenê. Ma sey DEM Partî do berpirsîyarîya xo bîyarê ca. Ma pawenê ke her kes wezîfeyê xo bîyaro ca.''

Birayê Sirri Sureyya Onderî, Alî Fuat Ondero ke  heyet de ca geno, vat çi heyf ke birayê ci şahîdîya na hele nêkerd la haştîye do ruhê ey şad bikero.

Mele Yîgît Kasimo ke ame heyet kerd raşt vat: ''Xeyalê ma yê 50 serran yenê ca. Paştîya ma keda Birêz Ocalanî ra pêt a. Heyet bi hêvîya pîle şino Başûr. Înşallah bi agêrayîşê ci heme şarî nefes genê.''

Vervatoxa Meclîsê Dayîkanê Haştîye yê Silopîya Asya Tay zî wina vat: ''Gerek mesajê haştîye ke bi vengdayîşê Rayber Apoyî do bêro dayene, raşt bêro famkerdene.  Ma dayîkî tim haştîye wazenê. Dayîkê heyet de yê, semedê resayîşê domananê xo şinê. Rayîrê înan akerde bo. Şîyayîşê înan wa bi haştîye bianore bêro tacîdarkerdene.''

Heyet bi tîlîlîyan ver bi Berê Sînorî yê Xabûrî yê Silopîya  kewtî rayîr.