Goristanê Garzanî mabênê dewanê Oleka Jor û Oleka Jêrî yê Bedlîsî de yo û tede 267 cenazayî est ê. Mabênê 8-17ê kanûne de goristan bibi hedefê hêrişî. 14-17ê kanûne de zî leşkerî kewtibî goristanî, înan bi kepçeyan gorî kenabî û cenazayî goran ra vetibî. Cenazayê ke ameybî vetene zî zereyê qutuyan de ameybî dekerdene.

Camî û akademîya goristanî zî wina ameybî rijnayene. Dima ke serebût eşkera bibi keyeyan muracat kerdibi la nînan rê amebi vatene ke cenazayî ameyê berdene bi Îstanbulî.

Leşkeran rijnayîşê goristanî ra dima herême de qereqolêk awan kerd û dekewtişê herême qasê 8 serran qedexe kerd. Qedexe emser qedîya. Dîmenê goristanî yê neweyî mojnenê ke goristan de tena çend kerrayê şikiteyî mendê. 

Qedexeyî ra herême de cigêrayîş nêeşkayêne bêro kerdene. Goristan de tena kerrayî, tayê herre û dêsêk mendê.

Roniştoxanê herême dîyar kerd ke rijnayîşê goran bêexlaqî yo û venga pawitoxanê heqanê merdiman û sîyasetmedaran da ke goristanî zîyaret bikerê. 

Wekîla DEM Partî ya Bedlîsî Semra Çaglar Gokalp derheqê babete de ajansê ma rê qisey kerd û ard ziwan ke înan Meclîsî ra  waşt ke wa no rijnayîş bêro cigêrayene. Semra îfade kerd ke gorî seba ke vîr û hişê komelî bêrê çinkerdene ameyê rijnayene û no çinhesibnayîşê rûmetê merdiman o.

Semra pare kerd ke hêrişê vera Goristanê Garzanî hêrişêko bêemsal nîyo û vat: ‘’Nedîyarbîyayîşê goranê Şêx Seîd, Seyîd Riza û Seîdê Kurdî zî sey hêrişê vera Garzanî yo. 2017 ra nata herême de cigêrayîş nêameyo kerdene. Destûr nêdîyayêne ke şar şoro goran ser. 

Eke talanê Goristanê Garzanî de dewlete têrî bêra û edalet bîyara ca no seba nîyetê haştîye do bibo gamêke. Edalet û haştîye bi hûrmetê merdeyan û têrîbîyayîşî do bêrê.’’