Şûbeyanê ÎHDyî yê Anqara û Îzmîrî semedê wedaritişê tecrîdê serê Rayberê Şarê Kurdî Abdullah Ocalanî Nobeta Haştîye daye destpêkerdene. Nobeta do her hewtê roja îneyî bêro kerdene.

Şûbeyê ÎHDyî yê Anqara bi waştişê ‘’Ma heqê haştîye pawenê, hewceyê ma haştîye est o, ma semedê haştîye nöbete de yê’’ Nobeta Haştîye daye destpêkerdene.

Hemserekê Pêroyî yê ÎHDyî  Ozturk Turkdoganî vat:’’Welat de meseleya tewr pîle meseleya kurdan a ke ganî bêro çareserkerdene. Welat her hetî ra mîyanê krîzî de yo. Ganî prosesê haştîye yo newe bêro înşakerdene. HDPyî ser o tay muneqeşeyî est ê. Pê xirabkerdiş dûrîfînayîşê HDPyî ma nêeşkenê tiway dest bifînê. Eke wina dewam bikero, Tirkîya do vîn bikero. Rayîrê çareserî haştîye ra ravêreno. Seba ke ma nê meseleyanê qisey bikerê ma nobete daye destpêkerdene. Çew kamî dir şer bikero ey de haştîye keno. Coka ganî tecrîdê serê Abdullah Ocalanî û embazanê ci bêro wedaritene. Ganî tecrîdê qefilnayîşî yê serê partîyanê sîyasîyan bêro wedaritene. Ganî tepişteyê nêweşî cade bêrê veradayene. Wa Tirkîya prosesê çareserî û bêpêkewtişî rê peyser agêro.’’

Şûbeyê ÎHDyî yê Îzmîrî de zî bi eynî waştişî nobete dîyaye destpêkerdene.