Tirkîya de demê peyênê de netîceyê zafbîyayîşê zext û îşkenceyê zîndanan de hûmara kesanê ke dinyaya xo bedilnaye zêdîyaye. Endamê Komîteya Zîndanî ya PKKyî  Pîro Dêrsimî babete ANFyî rê ercna.

Pîro Dersimî bale atne polîtîkaya hêrişkare ya dewlete ya ke vera kurdan yena rayraberdene ser û vat: ''Her kes qala haştîye keno û vera şîdetî vejîyeno le vera kurdan her hetî ra her ca de hêrişê girdî est ê. Welatê kurdan binê îşxalî de yo û kurdî raştê hêrişanê qirkerdişî yenê. Vera kurdan heme rayrîyê leyminî yenê şuxulnayene. Seba ke kurdî xo pawenê hêrs benê vanê qey şima xo pawenê. Ma heqê xo yê pawitişê meşrûyî şuxulnenê. Kurdî şey şarî wazenê payra bimanê. Vera sîyasetê û hêrişê qirkerdişî şerê destfînayîşê azadîye est o. Yew linga hêrişê qirkerdişî ya tewr muhîmî zî zîndanî. Xora kesê ke zîndan de yê vera sîstemî vejîyenê coka ûca de yê. Pê zîndanî mesaj danê komelî, vanê eke şima zî xover bidê cayê şima zîndan o. Eynî wextî de pê zextan kenê ke tepişteyan teslîm bîgêrê.

Hetê bînî ra şer bin kewtî, nêeşkenê payra vinderî. Deyndar ê, çimeyanê welatî roşenê, xo teslîmê hêzanê cîya cîyayan kerd o. Sebebê nê halê xo sey têkoşînê ma vînenî û coka hemrayê ma yê ke destê înan de yê înan ra wazenê qesas bigêrê. Wazenê îradeyê tepişteyan bişikinê, teslîm bîgêrê û qesas bîgêrê. Coka zîndanî açarnayî îşkencexane û keyeyanê mergî. Demê peyênî de zaf cenazayî zîndanan ra vejîyayî. No tesaduf nîyo. Seba ke hêrişî zêdîyayî hûmara şehadetan zî zêdîyaye. Nêweşî nînê tedawîkerdene, no qetilkerdiş o. Zîndanan de qirkerdiş es to.

Xora înfazî yenê vêşnayene. Kesê ke 30 serrî zîndan de mendê nînê veradayene. Ça de têkoşîn est o û ca sîyasetê qirkerdişî yê vera kurdan est o. Zîndan de zî wina yo.  Zîndanan de tradîsyonê 40 serran ê têkoşînî est o. Ewro zî embazê ma nê tradîsyonî anî ca. Îqtîdaro faşîst seba ke nê têkoşînî bişikino  çîyo ke destê ci ra yeno keno.  Ganî ma zî teberî ra paştî bidê têkoşînê zîndanan. Mesela tay çalakîyê merdimanê tepişteyan est ê la nê qîm nêkenê. Ganî nê çalakîyî bêrê xurtkerdene. Ganî şar wayîrê tepişteyan vejîyo tewrê çalakîyan bibo. Ganî vera faşîzmî berpirsîyarîyê dewrî bêrê caardene. Ma eşkenê pê têkoşînê hemparî nê îqtîdarê faşîstî bidê war.''