'Îqtîdar do bibo kiştoxê avûkatan'

Avûkate Ayşegule Çagatay Ebru Tîmtîk zîyaret kerd ke rojeyê mergî de ya û vat: ''Eke waştişê înan nêrê qebulkerdene hînî îqtîdar do bibo kiştoxê avûkatan.''

Pê îtîrafanê nakokan ê îtîrafker Berk Ercanî cuya xeylêk merdiman herimîyaye. Avûkatê Komeleya Huqûqnasan ê Hemdeman (ÇHD) û ê Buroyê Huqûqî yê Şarî (HHB) zî nê kesan ra yê. Avûkatan seba ke rîyê îtîrafan ra cezaya bi serran înan rê ameye dayene, pê waştişê hukmkerdişê edîlî yê muwekîlanê xo û dosyayanê înan, sey çareya peyêne dest pê grevê vêşanîye kerd û dima zî dest pê rojeyê merdî kerd.

Endama HHByî Ebru Tîmtîk û avûkatê tepişteyî yê bînî Oya Aslan, Barkin Tîmtîk, Selçuk Kozaagaçli, Behîç Aşçi yê ke Zîndanê Sîlîvrî de yê, grevê vêşanîye vurna rojeyê mergî. Avûkate Ayşegule Çagatay ê zîyaret kerdî û derheqê babete de ANFyî reyde qisey kerd.

Çagataye pare kerd ke pêvînayîşê 6ê nîsane semedê vîrusê Korona ra bi hawayêkê girewteyî ame kerdene û Zîndanê Sîlîvrî de vera janê vîrusê Korona tedbîrêk nêame girewtene.

Çagateye da zanayene ke Barkin Tîmtîk û Oya Aslan seba ke paştî bidê Ebru Tîmtîk û Aytaç Unal grevê vêşanîye yê xo heta 8ê nîsane kerd derg la avûkatanê bînan grevê vêşanîye qedîna. Çagataye eşkera kerd ke rewşa weşîye yê avûkat Behîç Aşçiyo ke wextêkê dergî ra anta rojeyê mergî gêno, hol nîya û  Aşçi semedê vîrusê Korona kategorîyê rîskî de yo coka seba veradayîşê ci ê do muracat bikerê.

Çagataye ard ziwan ke Barkin Tîmtîk rîyê grevê vêşanîye ra bi 50 kîlo û rewşa Selçuk Kozagaçli zî hol a.

Çagataye vat: ''Merdimî seba heqanê xo yê Qanûnê Bingeyî rojeyê mergî gênê. Hêlîne Bolek seba azadîya fikran û vatişê deyîran rojeyê mergî de bîye. Mustafa Koçak zî bi heman hewayî seba hukmkerdişê edîlî dest pê grevê vêşanîye kerd. Rîyê îtîrafanê Berk Ercanî ra cezaya muebede dîyaye înan. Qaşo Tirkîya de dardekerdiş qedee yo labelê bi lîsteyan merdiman kişenê. Asayîşê cuya merdiman çin o, cuya înan binê rîskî de ya.''