Senatorê fransizî Pascal Savodelliyî mektubêke şawitibî Wezîrê Karanê Teberî yê Fransa Jean-Noel Barrotî û tede vatibi ke ganî Fransa Îdareyê Xoserî yê Rojawanî tena nêverda. 

Barrotî cewab da mektube û ard ziwan ke Fransa kurdanê Sûrîye pawena û xîretê Fransa yê seba aramîya herême dewam kenê.

Barrotî wina vat: ‘’Fransa rewşa kurdanê Sûrîye bi baldarî teqîb kena. Fransa mîyanê Koalîsyonê Mîyanneteweyîyî de QSDyî reyde vera DAÎŞî têkoşîn kerd. Bi rijîyayîşê rejîmê Esadî zî herême de hêvîyêka pîle aferîyaye. Sûrîyeya newîye de ganî kurdî bi hawayêkê têdûştî beşdarê newe ra awankerdişî bibê, wayîrê nasnameyan bibê û heqê înan bişinasîyê.

Peymana ke 10ê adare de mabênê Hukmatê Sûrîye û QSDyî de ameya morkerdene hetêkî ra gama pozîtîfe ya verên a. Ganî newe ra awankerdişê Sûrîye de entegrasyonê kurdan bêro caardene. Sey Fransa seba mabênçîtîye û paştdayîşî dîyalogê ma dewam kenê. Ma 24ê nîsane de zî Hewlêr de Fermandarê Pêroyî QSDyî Mazlûm Ebdîyî reyde pêvînayîş kerd. Pêvînayîş de ma rayîr û metodê caardişê asayîşê kurdan ercnayî.

Ma xîret kenê ke entegrasyonê kurdanê Sûrîye bîyarê ca. Ma mabênê kurdanê Rojawanî û selahîyetdaranê Tirkîya de zî mabênçîtîye kerde. Ma tim venga selahîyetdaranê tirkan danê ke kêmkerdişê alozîye teşwîq bikerê, peynîya şerî bîyarê. Ma seba pêvînayîşanê mabênê kurdanê Sûrîye û kurdanê Iraqî zî xebitîyenê.’’