Nuştox Sefkan Kobanêyî derheqê prosesê seba çareserîya meseleya kurdan de ajansê ma rê qisey kerd.

Kobanêyî ard ziwan ke PKK bi mîsyonê xo yê tarîxîyî werişto we û birê tarîxîyî girewtê. Kobanêyî vat: ‘’PKK bi feshkerdişê xo seba prosesê neweyî hetê Rayber Apoyî de vindert. La seba ke PKK çekan war verdo ganî hêverî seba Rayber Apoyî ‘heqê hêvîye’ bêro caardene. 

Bi nê hawayî do mabênê wird terefan de dîyalogê raştikênî dest pêbikerê. Mîyanê AKPyî de hema zî prosesî ser o nakokîye est a. Eşkera yo ke terefêk haştîye nêwazeno. Nîqaşanê serê çareserîya meseleya kurdan de îqtîdar meşxul keno

Sefkan Kobanêyî pare kerd ke Rojawan de û Sûrîye de alozîye dewam kena la mabênê rejîmê Şamî û Îdareyê Xoserî de dîyalogî zî yenê kerdene. Kobanêyî vat: ‘’Mîyanê HTŞyî de xeylê hêzê cîyayî est ê. Tirkîya zî paştî dana HTŞyî. Dewleta tirke bi rayîrê HTŞyî dişmenîya kurdan kena û kena ke herême têmîyan bikera.

Tirkîya hêzanê Rojawanî ra çekverdayîşî ferz kena. Yanî şerêko psîkolojîk û taybet yeno kerdene. Dewleta tirke kena ke tedayan bikera. Seba ke proses bi xurtî bêro kerdene ganî dîyalogî Rayber Apoyî de bêrê kerdene. Yewîya Sûrîye bi demokrasî bena. ‘’