Wekîlê DEM Partî yê Şirnexî Zekî Îrmezî derheqê vengdayîşê ‘Haştîye û Komelê Demokratîkî’ yê Rayber Apoyî de ajansê ma rê qisey kerd.

Îrmezî dîyar kerd ke pêro şarê Rojhelatê Mîyanênî eşkenê tesîranê vengdayîşê Rayber Apoyî yê tarîxîyî bivînê û îfade kerd ke seba afernayîşê haştîye û demokrasîyî her safha ganî bêra esaskerdene.

Îrmezî vat: ‘’No manîfestoyo ke ma sey vengdayîşê seserrî pênase kenê perspektîfêkê neweyî, atmosferê sîyasîyî û prosesî aferneno. Bêguman hêvî û waştişê şaran seba haştîye her wextî ra zafêr gandar o. No beno sebeb ke ma zî hêvîdar bibê. No vengdayîş seba haştî û demokrasîyî girîng o û ganî her kes wayîrê nê prosesî vejîyo.’’

Îrmezî da zanayene ke nê vengdayîşê tarîxîyî pêro dinya de tesîrî viraştê û vat: ‘’Eşkerayîyê ke yenê dîyenê ma nînan ra fam kenê ke vengdayîş tesîrêkê pîlî virazeno.’’

Îrmezî ard ziwan ke seba ke proses bi hawayêkê pozîtîfî aver şoro ganî cade azadîya Rayber Apoyî bêra caardene. Îrmezî vat: ‘’Ganî şert û mercê Birêz Ocalanî bêrê vurnayene. Mumkîn nîyo ke o hucreyêk de derheqê babete de xebatan bikero. Ganî derheqê heqê hêvîye de qanûnî bêrê raştkerdene. Meclîs seba averberdişê nê prosesî ganî înîsîyatîf bigêro.’’