Şubeyê Îstanbulî yê Komeleya Huqûqnasan a Seba Azadîye (OHD) bi eşkerayîyêke pare kerd ke Zîndanê Sîlîvrî de îşkenceyê gardîyanan ra 6 tepişteyan xîret kerd ke xo bikişê.

Eşkerayîye de wina ame vatene: ''Goreyê agahîyan 6ê nîsane de 60 gardîyanî kewtî koxûşê tepişteyanê edlî, lapatî eştî înan, înan rê gefî werdî û pêkewtiş qewimîya. Naye ser o tepişteyêkî krîz kerd.

Rojêke ra dima 60 gardîyanî reyna kewtî koxûşî û mudirê sazf-gehî zî mîyanê înan de bi. Mudirî vat 'Ma do şima bigêrê fîlmî', tepişteyan rê gefî wendî, 6 tepişteyan rê îşkence kerd. Tepişteyan teda û şîdetê gardîyanan ra xîret kerd ke xo bikişê. Gardîyanan û xebatkaranê weşîye rixmo ke serebût dîyo çîyêk nêkerd la tepişteyanê bînan xîret kerd ke verê serebûtî bigêrê.

8ê nîsane de 6 tepişteyan nêzdîyê 40 hebî werdî, xîret kerd ke xo bikişê. Nînan ra yew servîsê ciewnîyayîşê giranî de yo. Ame îdîakerdene ke yewê tepişteyan ra yo ke xo kişto, cenazaya ci erşawîyaye Êlihî. Wezîfedaranê zîndanî na babete de agahîye nêdaye.

Zîndanê Sîlîvrî de hem qedexeyê îşkenceyî, hem zî heqê merdiman yenê binpaykerdene. Ma do babete teqîb bikerê. Mesuldarê nê serebûtan Wezaretê Edaletî yo. Ma venga ci kenê ke wa derheqê nê îdîayan de cade eşkerayîyêke bido.''