Kongreya Demokratîke ya Şaran (HDK), HDP û Hêzanê Têkoşînî yê Yewbîyayeyan (BMG) vera şuxulnayîşê çekanê kîmyewîyan Îstanbul de çalakîyêke organîze kerde.

Çalakîye de hêrişê kîmyewîyî yê dewleta tirke yê ke bi hemkarîya PDKyî vera herêmanê Zap, Avaşîn û Metîna yenê kerdene ameyî protestokerdene. Rayraşîyayîş Kuçeyê Mîsî yo ke serê Şîşhane û Kuçeyê Îstîklalî de yo pê sloganan dest pê kerd. Polîsan hêriş kerd û çalakwana Nobeta Edaletî Kumrî Akgul zî tede xeylêk kesî destbend kerdî.

Çalakwanê ke şîyê verê Lîseya Galatasarayî pê rayraşîyayîşî hêrişê kîmyewîyî şermezar kerdî. Polîsan reyna hêriş kerd û xeylêk kesî pê kelemçekyanê peykîyan destbend kerdî. Badê hêrişê polîsan çalakwanî kuçeyan ra bîyî vila û ver bi Şîşhaneyî rayra şîyî. Polîsanê tirkan wekîlê HDPyî Sezai Temelli, Ayşe Acar Başaran, Gulîstane Kiliç Koçyogit û Tayyîp Temel zî tede xeylêk kesî girewtî binê ablûqa. Grûbanê bîna rayraşîyayîşê xo rê dewam kerd. Hetê bînî ra verê Baroyê Îstanbulî de wekîlanê HDPyî binê ablûqaya polîsan de eşkerayîye daye.

Sezaî Temelliyî ke tîya qisey kerd vat: ''Ewro kam ke vera şerî vejîyeno kuçeyan yeno tepiştene. Wina yew rejîm est o.  Ewro Şebneme Korur Fîncanci bîlasebeb zîndan de ya. Şuxulnayîşê çekanê kîmyewîyan sûcê merdimîye yo. Kam ke vera nê mevejîyo hemkarê nê sûcî yo. Ma pêro pîya vînenê ke şer senî bîyo sebebê rijnayîşê girdî.  Vera şerî vejîyayîş vervejîyayîşê vera feqîrîye yo. Coka ma vanê ke metersê, vengê xo bivejê. Ewro Îstanbul û Silopî de bi hezaran kesî vera hêrişanê kîmyewîyan vejîyayî kuçeyan. La bi desan îdarekar û endamê ma ameyî destbendkerdene.  Pê helîkopteran û polîsan kenê ke verê ma bîgêrê. Hêrişê înan mojneno ke ê sûcdar ê. Heta ke meseleya hêrişanê kîmyewîyan nêro cigêrayene û safîkerdene ma do tim kuçeyan de bê.''

Çalakwanê ke kuçeyan ra vila bîyî dima ra verê banê HDPyî de ameyî pêser.