Platformê Dezgehanê Demokratîkan seba ke bale bianco serê merganê peyênan ê zîndanan û rewşa tepişteyanê nêweşan ser  bi şîarê 'Tecrîd û bêedaletîye mirnenê, tepişteyanê newşean rê azadîye' waşt Taksîm Tunel de eşkerayîye bidê la polîsan hêriş kerd.

Vervatoxê HDKyî Cengîz Çîçek, wekîl û îdarekarê HDPyî, Dayîkê Haştîye, aktîvîstê TJA û xeylêk kesî tewrê çalakîye bîyî. Polîsan hêrişê çalakîye kerd û wekîlê HDPyî Musa Pîroglu û Oya Ersoy girewtî binê ablûqa kerd ke şarî vila bikero. Polîsanê ke destûr nêda rojnamegerî dimenan biancê hêrişê şarî kerd û 8 kesî destbend kerdî. Semedê protestokerdişê nê kerdişanê keyfîyan Kuçeyê Îstîklalî û Şîşxane ra ver bi banê HDPyî yê Îstanbulî rayraşîyayîş ame kerdene.  Rayraşîyayîş de bi sloganan xoverdayîşê zîndanan ame selamkerdene. Polîsan tîya zî verê şarî girewt û 3 kesê bînî destbend kerdî.

Rixmê heme hêrişan wekîlan Meydanê Galatasarayî de eşkerayîye daye. Musa Pîrogluyî ard ziwanke zîndanî açarîyayî cehenemî û vat: ''Eke zîndanan de zulm esto, kuçeyan de zî esto. Bi seyan gerguşî zînanan de yê. Tepişteyê nêweşî zîndanan de mergî rê ameyî caverdayene la êyê ke kundox roşenê û cinîyan qetil kenê yenê veradayene. Şima se kenê bikerê do rojêke na ablûqa bêro vilakerdene, no îqtîdar bêro rijnayene û tepişteyê nêweşê ke zîndan de yê bibê azad.''

Oya Ersoy zî vat: ''Çalakîya ma sey 'sûcî' hesibnenê û qedexe kenê. Nê welat de yew sûc esto. Êyê ke mesuldarê cuya tepişteyanê û înan mergî rê caverdenê ê sûc kenê. Aysele Tugluk bado ke cenazaya dayîka ci rê hêriş ame kerdene hafîzayê xo vînî kerde û rixmo ke nêweşa nêeşkena têna miqatê xo bi hucre de yena tepiştene.  No çi hers o? Şima senî eşkenê pê hend xirabîye biciwîyê? Êyê ke ewro nêverdenê ma semedê tepişteyan vengê xo berz bikerê, ê tepitşeyanê nêweşan mergî rê caverdenê. Ma bi şebekeyêkê sûcî rî bi ri yê.  No faşîzm o.  Wa mero vîrakerdene ke tarîxê nê welatî tarîxê xoverdayîşê vera zulman o. Xoverdayoxî do ser bikewê.''