Vera tepişîyayîşê Şebneme Korur Fîncanciya ke hêrişanê kîmyewîyan ser o cigêrayîş waştbi û vera tepişîyayîşê rojnamegeranê ke hêrişanê kîmyewîyan ser o xeberî viraştbî nêrazîbîyayîşî dewam kenê. Hemserekê Şubeyê Îstanbulî yê Komeleya Huqûqnasan a Seba Azadîye (OHD) Gurkan Îsteklîyî derheqê babete de ANFyî rê qisey kerd.

Îsteklîyî îfade kerd ke merdimê ke wazenê dîmenê serê hêrişanê kîmyewîyan cibigêrîyê yenê hedefkerdene la herinda înan de ganî wina bêro kerdene ke heyetê xoserî herême de cigêrayîşî bikerê.

Îsteklîyî vat: ''Eke dewlete şuxilnayîşê nê çekan red kena ganî seba cigêrayîşî zî veng bida. La eke merdimê ke wazenê hêrişan bêrê cigêrayene yenê hedefkerdene o çax rewşe bena sebebê şikan. Rojnamegerî eşkenê her çî ser o xeberan bikerê, îdîayan ser o vinderê. Verî zî binê nameyê 'operasyonanê KCKyî' de rojnamegerî ameybî tepiştene. Bi nê hawayî nê rojnamegeran rê îşkence yeno kerdene ke sûcê îşkenceyî de krîterê wextvîyartişî çin o.''

Îsteklîyî da zanayene ke her ke weçînayîş beno nêzdî asta faşîzmî zî zêdîyena û hîna zaf raştîyî komelî ra yenê nimitene. Îsteklîyî vat: ''No zulm ver bi weçînayîşî do bizêdîyo. Vera nê zulmî û bêhuqûqîye ganî her kes vengê xo berz bikero. Êyê ke nê zulmî kenê bêvengîya komelî ra paştî gênê. Ma sey huqûqnasan heta peynî do vera nê bêhuqûqîyan vinderê.''