Merkezê Komelê Demokratîkî yê Kurdan (NCDK) şaristanê Sydneyî yê Awustralya de roja Şeme çalakîyêka protestoyî viraşte.

Kurdî û dostê înan meydanê Town Hallî de kom bîyî, hêrişê îşxalkarîye yê dewleta Tirkî şermezar kerdî û paşt da xoverdayîşê Rojawanî. Şaredarê Marîcwîllî yê Partîya Keskan ra Colman Smîth zî tewrê çalakîye bîyo û pare kerd ke dewleta Tirkî huqûqê mîyanneteweyî binpay kerd. Smîthî vat Tirkîya sucê şerî kerdî û wazena pakîya etnîke bike. Senatoro verên ê Partîya Keskan ra Lee Rhîannonî zî bale ante serê destûrê Trumpî yê seba îşxalkarîya dewleta Tirkî û vat, "Ma pêroyê verê naye de mat mendî. Qerarêko winasên xizmetê Erdoganî kerd."

Rhîannonî da zanayene ke  ê zanenê dewleta Tirkî Efrîn de se kena û veng da her kesî ke amayox de paşt bidê şarê Kurdî. Rhîannonî vat ke ganî Serekkomaro Tirk Erdogan mehkemeya sucanê şerî de bêro hukmkerdene.