Îşxalkerdişê Rojawanî û netîceyê ci

Dewleta Tirkîya ya ke seba ke Rojawanî îşxal bikera galan kena bin kewena. Bi tena apey ancîyayîşê sînoranê xo zî a do mexelesîya.

Vakur û Rojhelatê Sûrîye û Rojawanê Kurdîstanî verê çimanê pêro dinya de ameyî îşxalkerdene. Binê nameyê Hêrema Biemnîyete de vera kurdan galî ameyê zêdekerdene; Bi îşxalê Serêkanîye û Girê Sipîyî meydanêk cergan rê ameyo afirnayene. Beyanatî, sozê ke peymanan de dayîyaybî pêro nîyamey caardene. Adirbesto ke seba ke vera îşxalî xoverdayîşêko pêt ameybî dayêne, bire dîyaybî ci, pey cû eşkera bî ke seba şikitişê xoverdayîşî ameyo kerdene. Tirkan no taktîk Vakurê Kurdîstanî de zî xebitnaybî û cira “prosesê halkerdişî” vatene. Rojawanî de zî her çiqas behsê adirbestî bêro kerdene zî galî dewam kenê.

Mîyanê şerêkê winasî de çîyêko asan nîyo ke pêvînayîşê dîplomatîkî bêrê kerdene. Serekê DYAyî derheqê persanê ke derbarê Vakur û Rojhelatê Sûrîye de ameyê perskerdene vat ke “gelekî baş o”. No helwestê ey helwestê înkarî yo. Meydan de rewşêka başe çin a. Meydan de tena xoverdayîşê kurdan esto. Çunke Vakurê Kurdîstanî de galê qirkerdişî her sewîya de, Başûrê Kurdîstanî de seba hîrakerdişê meydanê îşxal û çinkerdişî, Rojawanê Kurdîstanî de zî galê îşxalî dewam kenê. Sere de heta ke Vakurê Kurdîstanî de mesela kurdan mêra çareserkerdene do çîyêko baş meqewemîyo.

Raberîya  PKKyî de xoverdayîşo ke şarê kurdan keno bêhempa yo. Sergêra 42. a ronayîşê PKKyî de pêro dinya qirîna azadîye ya kurdan eşnawite ke na yewe netîceyêko pêhempa ya.

'NATO hetê mezgî ra merdo’

Têkilîyê Dewleta Tirke ê teberê NATOyî, xebitnayîşê çekanê kîmyewîyan û sucê şerî bî sebebê munaqeşeyêkê neweyî. Welatanê ereban de Tirkîya êdî teşhîr bîya, qîymetê xo çin o. Şarê Rojhelatê Mîyanênî êdî vînenê û anê ziwan ke Dewleta Tirke herême de çimeyê kanserî ya.

Fransa vat ke NATO hetê mezgî ra merdo. Rewşe winasî bî sebeb munaqeşayanê derheqê îtîfaqanê neweyan yê hêzî. Labelê êdî hêzê pîlî îtîfîqan awan nêkenê, dewr yew dewro winasîyo ke îtîfaqî êdî bi xoverdayîşê şaran ênê ronayene.

PKK îtîfaqî kerdî vila

Têkoşînê 41 sereyî yê PKKyî îtîfaqê hêzanê emperyalîstan kerdî vila. Reya verê DYA de nakokîya xomîyanî, cîyayîya fikiran bi hawayêkê zelal ameyî muneqeşekerdene. Hêzê sey DYA ya emperyale derheqê kurdan de kewte nakokîya xomîyanî mîyan. Na yewe zî vurîyayîşê pradîgma nîşan dana.

Di madeyê ke pawigê Tirkaya yê

Derdorê Tirkîya de rojevêke geş bena.

*Îdlîbî ra vejîyayîşê Tirkîya û cerganê xo. Dewleta Sûrîye na babete ser o têkoşînek dayo detspêkerdene. Cadkerdişo ke wazeno cergan Îdlîbî de sey sîvîlan nîşan bido do pûç bibo. Îdlîbî ra vejîyayîşê Dewleta Tirke ra serkewte do Efrîn, Cerablus, Bab û Ezazî ra vejîyayîşê ci zî bêro rojeve. Tîrkîya tena bi apey de sînoranê xo mîyan ancîyayîşî do meeşka xo na yewe ra bixelisna.

*NATO ra vejîyayîşê Tirkîya yeno munaqeşekerdene. Na rewşe tena hetê Tirkîya ra ney, parelelê muneqeşeyê bi Natoyî ra zî do geş biba. Tirkîya rewşa xo ya jeostratejîkî bi hêzanê emperyalan dana xebitnayîş, bi naye hêvî kena ke prosesî ra serkewte vejîya la do vîndîkerdişê xo hîna zêde bê û zêdeyêr tede şora.