Heyetê Îdareyî yê Îtîfaqê Averwazî (Progressive Alliance) yo ke binê sîwana ci de 93 welatan ra 135 partîyê sosyalîst û demokratî ca gênê kombîyayîşê xo yê 1ê teşrîna verêne de bire daye ke paştdayîşê xo yê bi HDPyî pîl bikero. Hemvervatoxê Têkilîyanê Teberî yê HDPyî Hişyar Ozsoy zî endamêkê nê îtîfaqî yê.

Heyetê Îdareyî yê Îtîfaqê Averwazî derheqê babete de vernîyazo ke hetê Partîya Sosyalîste ya Ewropa (PES) ra amebî pêşkêşkerdene qebul kerd.

Îtîfaqê Averwazî vist vîrî ke HDP ser o bi Dewaya Kobanê tehlukeyê qefilîyayîşî esto, hemşaredar, sîyasetmedar, endam, îdarekar û wekilê ci tepişîyenê û tim beno hedefê hêrişan.

Îtîfaqê Averwazî vat: ''HDP eşkeno meseleya kurdan û meseleyanê bînan pê hêzê xo çareser bikero. Îxtîmalê qefilnayîşê HDPyî do meseleya kurdan giranêr bikero û derbe bido demokrasîya Tirkîya. Ma veng danê ke cade tedaya vera HDPyî bêra qedînayene, tepişteyê sîyasî yê HDPyî bêrê veradayene, herinda weçînitoxan de tayînkerdişê qeyûman ra wa fek bêro veradayene, goreyê bira Mehkemeya Heqanê Merdiman a Ewropa Selahattîn Demîrtaş wa cade bêro veradayene. Ma tedaya Tirkîya ya vera muxalîf û pawitoxanê heqanê merdiman şermezar kenê. Ganî Tirkîya peynîya nê kerdişan bîyara.

Ma bi hawayêkê zelalî paştdayîşê xo yê bi têkoşînê HDPyî îlan kenê. Ma do nêzdî ra tedaya muhakemekerdişî ya vera HDPyî teqîb bikerê. Ma venga pêro endamanê Îtîfaqê Averwazî danê ke paştdayîşê bi HDPyî pîlêr bikerê.''