Îtîfaqê Kede û Azadîye Merkezê Kongreya Halîçî de deklarasyonê xo yê 'xerîta' eşkera kerd. Salone de lolîpopanê bi nuşteyê 'Demokrasî', 'Azadîye', 'Cinîye, 'Kede', 'Haştîye', 'Xoza' û 'Ciwan' ameyî cakerdene û pankartê bi nuşteyê 'Ma do pîya bivurnê', 'Îtîfaqê Kede û Azadîye' daliqîyayî.

Karkeran bi sloganê xo kongre de zaf bale ante. Bi seyan kesan pê tîlîlîyan govende girewte.

Îtîfaqê Kede û Azadîye kongre de deklarasyonê xo yê 'Xerîta' eşkera kerde. Partîya Karkeranê Tirkîya (TÎP) ra Melîse Akyurek û Partîya Kede (EMEP) ra Levent Gokçekî eşkerayîye wende.

Deklarasyon wina yo:

''Wezîfeyo lezabez ê dewrê verê ma no yo ke rijnayîşê Îtîfaqê Cumhurî vindarno, îdareyê tekmerdimî biqedîno, şertê şarî holêr bikero, esasê azadîye û heqanê demokratîkan de vurîyayîşêk bikero. Seba nê vurîyayîşî girîng o ke têkoşîno hempar û yewbîyaye bihêz bêro kerdene. No têkoşîno hempar û tewiro qerardar seba caardişê waştişanê şarî û demokratîkbîyayîşî do bibo rayraşîyayîşêk. Seba nê rayraşîyayîşî zî weçînayîşê verê ma zaf girîng ê.

Nê prosesê weçînayîşî de zaf girîng o ke têkoşînê kede û demokrasî bêro berzkerdnee, şar motîve bibo û asayîşê weçînayîşî bêro caardene. Îtîfaqê ma îtîfaqê bindestan o ke ê cinî, xizan, ciwan, pawitoxanê heqan û xoza û kedkaran o.

Sîstemê ekonomî 

No îqtîdar ekonomîya xo goreyê sinifa sermaye, terefgîranê xo û menfaetanê holdîngan awan keno. Netîceyê nê polîtîkayanê kolonyalîst û tedakeran zî bîyî derdo yewin ê şaran. Ewro meseleya verên a ke şertê xebitîyayîşî û ciwîyayîşî yê karker û kedkaran bêrê holkerdene. Şert o ke faturaya krîzî sermaye rê bêra birnayene û pê polîtîkayanê hewceyan kedkarî bêrê pawitenê. Na çarçewe de; ganî bernameyêko ekonomîk ê winayên bêro kerdene ke tede do zemî vinderê, meaşî bizêdîyê, karî ra vetiş qedexe bibo, îstîhdam bizêdîyo, bacê madeyanê esasan wedarîyê, bacê edîlî bêgêrîyê û xizanîye biqeda. Gamê yewinî nê yê ke çimeyê budçe şer, qesr, terefgîr û deynanê teberî rê nê seba şarî bêrê dayene, faturayê awe, gaz, ceyran û înternetî xizanan rê nêgêrîyê, deynê KYKyî pak bibê, meseleyê karmendanê ke nêameyê tayînkerdene, çareser bibê, esnafan rê destek bêro dayene, deynê citkaran pakî bibê, xizanîya cinîyan bêra qedînayene, xebitnayîşê domanan bêro qedexekerdene û multecîyê ke nêwazenê abigêrê, asayîşê înan wa bêro caardene.

Demokrasî

Sîstemê Hukmatê Serekkomarîye demokrasî binpay kerd, bêedaletîye vila kerde, bêçaretîye zêdînaye û kerdişê faşîzanî kerdî polîtîkaya rojane. Armancê ma yo verên no yo ke nê tewirê hukmatî bivurnê, pirdê weçînayîşî wedarnê, heqanê demokratîk û sîyasîyan bigêrê binê garantî, sîstemêkê edîlî yê muhakemekerdişî ronê. Na çarçewe de; gamê lezabezî nê yê ke îdareyê herêmîyî bêrê ronayene, meclîsê şarî bêrê ronayene, rejîmê qeyûman biqedo, heqê sendîkabîyayîşî, heqê grevî û heqê peymankerdişî bigêrîyê binê garantî, saetê xebitîyayîşî bêrê kerdene 7 saetan, lokavt bêro qedexekerdene, layîkîye bêra awankerdene, heqê elewîyan pê qanûnan bêrê pawitene, hemwelatîya têdûşte sey krîterê esasî bêra qebulkerdene, KHKyî wedarîyê, mulakatî biqedê, polîtîkayê şerî bêrê teriknayene û teber de polîtîkaya haştîye bêra caardene.

Meseleya kurdan

Meseleya kurdan meseleyanê verênan ê Tirkîya ra aya tewr qedîm a. Seba çareserîya meseleya kurdan herinda sîyasetê înkar û teda de ganî demokrasî û haştîye bêrê caardene. Seba çareserîya meseleya kurdan zaf girîng a ke zemînê dîyalogan û çareserîye de sere de heqê perwerdeyê bi ziwanê dayîke pêro heqê nasnameyî yê kurdan bişinasîyê û seba nê heqan weçînayîşê hewceyî bêrê kerdene.

Cinîyî

Seba ke cinîyî her hetê cuye de azad û têdûşt bibê têkoşînê vera sîstemê serdestîya camêrdan û kerdişanê nê sîstemî, şîdetê camêrdan û qirkerdişê cinîyan şert o. Seba ney gamê lezabezî nê yê ke cade Peymana Îstanbulî bêra caardene, pêro astengîyê vera cinî û endamanê LGBTI+ bêrê wedaritene.

Ciwanî, astengdarî û komelê dezavantajinî

Astengîyê vera ciwanan wa bêrê wedaritene. Perwerde her ca de ganî bêpere, zanistî û bi ziwanê dayîke bibo. Ciwanî wa waranê ekonomîkan de destek bivînê. Vera cîyakerîyanê serê domanan wa bêrê wedaritene. Seba ke hemwelatîyê astengdarî sey hemwelatîyanê bînan xizmetanê umûmîye bişuxilnê ganî qanûnî bêrê kerdene.

Xoza

Ganî pêro projeyê ke xoza telan kenê bêrê vindarnayene, vera krîzê îklîmî rewşa lezabeze bêra îlankerdene, pêro polîtîkayan de pawitişê xoza bêro esaskerdene û gandarê ekosîstemî hetê qanûnan ra bêrê pawitene. Ganî cade talanê zengînîyanê tarîxî û kulturelan biqedo.

Vengdayîş

Ganî ma pîya mesuldarîye bigêrê xo milî û welatî pê waştişanê hemparan û têkoşînê hemparî bi hawayêkê demokratîk û azadî awan bikerê. Şarê Tirkîya mehkumê cîyakerî, nefret, terefbîyayîşî û sîyasetê Îtîfaqê Cumhurî yan zî sîyasetê Îtîfaqê Miletî nîyê. Ma eşkenê serê esasê kede, haştîye, azadîye û demokrasî de sîstemêkî awan bikerê. No bi hêzê vurnayîşî yê kedkar û bindestan mumkîn o. Nê esasî ser o ma venga her kesî danê ke bêro têkoşînê hempar û yewbîyayeyî!

Ma do pîya ser bikewê...''

Endamê Îtîfaqê Kede û Azadîye ney ê:

“Partiya Tevgera Kedkar (EHP), Partiya Demokratîk a Gelan (HDP), Partiya Kedê (EMEP), Federasyona Meclisên Sosyalîst (SME), Partiya Karkeran a Tirkiyeyê (TÎP), Partiya Civakî ya Azadiyê (TOP) û pêkhateyên HDP’ê; Partiya Yekbûyî ya Şoreşger (BDP), Partiya Herêmên Demokratîk (DBP), Partiya Sosyalîst a Bindestan (ESP), Platforma Piştevaniya Sosyalîst (SODAP), Partiya Jinûveavakirina Sosyalîst (SYKP), Partiya Kesk a Çep (YSP).”