Partîyanê Îtîfaqê Kurdîstanî Amed de kombîyayîşêk kerd. Hemserekê Pêroyî yê HDPyî Mîthat Sancar, Hemserkê Pêroyî yê Partîya Herêman ê Demokratîkan (DBP)Salîha Aydenîz û Keskîn Bayindir, Hemserekê Pêroyî yê Komunîste ya Kurdîstanî (KKP) Sînan Çîftyurek, Hemserekê Pêroyî yê Partîya Merdiman û Azadîye (PÎA) Mehmet Kamaç,  Serekê Partîya Demokrate ya Kurdîstanî ya Tirkîya(T-KDP) Mehmet Emîn Kardaş, Endamê Meclîsê Partîya Sosyalîste ya Kurdîstanî (PSK) Alî Haydar, Hetkarê Serekê Pêroyî yê  Têgêrayîşê Azadî Camal Sati, Serekê Pêryoyî yê Partîya Demokrate ya Kurdîstanî ya Vakurî Sertaç Bucak, Endamê Komeleya Kurdan a Demokratîke-Şorişgêre (DDKD) Halîm Îpak û wekîlê HDPyî Îmam Taşçier, Semra Guzel, Nusrettîn Maçîn û Necdet Îpakyuz tewrê kombîyayîşî bîyî.

Eşkerayîya hempare hetê Mîthat Sancarî ameye kerdene. Sacnarî ard ziwan ke ê ameyî têhet ke derheqê deklerasyonê HDPyî yo ke 27ê êlule de ame eşkerakerdene de fîkrê xo vajê û wina dewam kerd: ''Ma pê bawer ê ke meseleyî pê rayîranê demokratîkan û metodanê muzakereyan yenê çareserkerdene. Xora muzakere têna dîyalogê fîkranê sey yewbînan nîyo. Muzakere  qiseykerdişê fîkranê cîya cîyayan û cigêrayîşê akerdişê rayîran o. îtîfaqê demokrasî û haştîye ke ma cehd kenê ke ronê bitaybetê çareserkerdişê meseleya kurdî û haştîye hedef keno. Xora meseleya kurdî û meseleya demokrasîyî yê Tirkîya yewbînan rê pabesteyê. Coka ma wazenê îtîfaqê ke hîra ronê. Ma îtîfaqê sey karêkê vîjnayîşî nêvînenî. Îtîfaq hemkarîya têkoşînî ya. Ma wazenê wa heme partîyê kurdan kişta ma de cayê xo bîgirê. Eke ma yew îtîfaqê xurtê ronê ma eşkenê gamanê pîlan bierzê û dewrê ke neweyî bidê destpêkerdene. Wina ma eşkenê rayîrê çareserkerdişê meselan abikerê.''

Sancarî ard ziwan ke înan bi partîyanê kurdan kombîyayîşêko muhîm kerdo û vat: ''Ma do ewro ra tepîya bi gamanê zixman pîya rayra şirê û pîya înşa bikerê. Semedê pîya ronayîşê ameyoxî ma do xabatanê xo xurtêr bikerê. Nika mesele tewr verêne haştîye ya. No îqtîdar pê polîtîkayanê şerî xoweye keno. Pê şerî wazeno payra bimano. Demo peyên de reyna semedê şerî vajîyenê. Wezîfeyê ma oyo ke ma nika cade yewîya vera şerî ya hîraye ronê. Her wextî ra zafêr ma hewceyê têgêrayîşê haştîye yê. Ganî têkoşînê vera şerî bêro xurtkerdene. Ma do semedê pîlkerdişê nê têgêrayîşê vera şerî her ca de bigurîyê. La cayê destpêkerdişî na herr a. Şer xora vera Kurdîstanî yeno rayraberdene. Coka ganî têgêrayîşê vera şerî zî tîya ra vejîyo. Ma verî têgêrayîşê haştîye yê kurdan ronê. Bêrê ma pêro pîya nê îtîfaqê vera şerî yê kurdan  ronê û vera şerî tîya ra vengê xo yê berzî vejê.''