HDP, DBP, Mayanê Haştîye, TJA, Ege TUAYDERî û Partîya Çep a Keske waşt ke qezaya Alsancakî ya Îzmîrî de hêrişê PDKyî yê vera gerîlayan ser o eşkerayîyêke bidê. Wekîlê Partîya Çep a Keske Gulîstane Kiliç Koçyîgît, Burcuye Gul Çubuk, Yilmaz Gun û Ceylan Akça zî tewrê çalakîye bîyî. 

Girse wexto ke serê rayîrî de ame pêser polîsan dormeyê ci girewt. Polîsan hêrişê girseyî kerd û pê şîdetî çalakîkerî destbend kerdî. 

Nêrazîbîyayîşê wekîlan ser o girseyî ver bi bînaya HDPyî rayraşîyayîş kerd la polîsan reyna verê girseyî girewte. Wekîle Gulîstane Kiliç Koçyîgît polîsan rê vat: ''Şima PDKyî pawenê? Çew nêeşkeno yewîya kurdan asteng bikero.''

Polîsan rojnamegerî warî ra dûrî vistî, dormeyê wekîlan girewt û Hemserekê HDPyî yê Îzmîrî Berna Çelîk û Çinar Altan û Mayê Haştîye zî tede xeylêk kesî destbend kerdî. 

Polîsan wekîlî zî pê tirsanê xo derb kerdî.