Şahîdê Terteleyê Dêrsimî yo ke 1938 de Dêrsim de hetê dewleta tirke ra ame kerdene, Bego Polatî (Bedrî) saetanê şanî de , dinyaya xo bedilnaye. Bego Polat rîyê xeylêk nêweşîyan ra di rojî yo serwîsê ciewnîyayîşê giranî  de ameyêne tedawîkerdene.

Bego Polat hema 9 serre bi ke Terteleyê Dêrsimî qewimîya. Dayîke û hîrê wayûbirayê ci verê çimanê ci de ameyî qetilkerdene û erzîyayî awe û o birîndar xelisîya.

Çîyê ke Polatî ê serran de ciwîya hetê kênaya ci Rose Polat Agum ra ameyî nuştene û bîyî kitab.Goreyê kitabî babîyê Polatî Hasan Polat verê terteleyî rojêke hetê leşkeran ra yeno berdenê qereqol û reyna  tira xebere nîna girewtene. Naye sero birayê ci Alî û Huseyîn tewrê xoverdayoxan benê. Dayîka ci Humar û wayûbirayê ci Elife, Bira û Hatîce zî verê çimanê ci de yenê qetilkerdene. Bego Polat zî tewrê cenazayanê bînan erzîyeno awe la o birandar xelisîyeno. Dima ra şino koyan de cayê birayanê xo û heta ke qanûnê efû vejîyeno ûca mamano.

Rêxistina HDPyî ya Dêrsimî hesabê xo yê medyaya sanale ra mesajê serweşîye weşana û dejê xo ard ziwan.