Goreyê xebera Reutersî Musteşarê Rêxistina Îstîxbaratê Milî ya Tirkîya (MÎT) Hakan Fîdanî peynîya tebaxe de Şam de Serekê Îstîxbaratê Sûrîye Elî Memlûkî de pêvînayîş kerdo.

Fîdanî 11ê êlule de Bexdad de serekê sunîyan Hamîs Hançer, Serekwezîr Mustafa El Kazimî û Serekkomar Berhem Salihî de zî pêvînayîş kerdbî û xeylêk wekîlanê Parlamentoyê Iraqî vera ney nêrazîbîyayîşê xo mojnabi.

Reutersî çimeyanê di selahîyetdaranê Tirkîya û çimeyêkê sûrîyeyîjî ser o nuşt ke Fîdanî Elî Memlûkî de pêvînayîş kerdo û Rûsya zî mabênçîtîya pêvînayîşî kerda. Goreyê selahîyetdarêkê/a tirkî/e Fîdanî zemînê kombîyayîşê wezîranê teberî yê wird welatan amade kerdo.

Selahîyetdarî/e vat: ''Rûsya wazena Sûrîye û Tirkîya meseleyanê xo çareser bikerê û pêkerdiş bikerê.''

Çimeyê Şamî zî îdîa kerd ke Rûsyaya ke bilîyê îşxalê Ukrayna ya, Sûrîye teşwîq kerda ke dest pê dîyalogan bikera. Heman çimeyî dîyar kerd ke armancê Fîdanî no yo ke zemînê pêkerdişê Tirkîya û Sûrîye awan bikero.

Dîya zanayene ke wextêkî ra nata mabênê wird terefan de pêvînayîşê nimiteyî dewam kenê.

Keyepelê Fransa Intelligence Online zî pare kerd ke roja çarşemeyî 7ê êlule de Moskova de mabênê Fîdan û Memlûkî de pêvînayîşêk ameyo kerdene.