Şayîya Amedî ya ke bi mîlyonan kesî tewrê ci bîyî rixmê provakasyon û astengîyan zî bi coşî ameye kerdene.  

Kurdîstanijê ke tewrê şayîya Newroze ya Amedî bîyî înan ANFyî rê qisey kerd. 

Omer Oner: Newroze goreyê serranê bînan hîna qerebalix a. Wextê dekewtişê warî de ma zaf zehmetî û zorî antî. Ma çar bendanê kontrolî ra derbaz bîyî. 

Ahmed Şenyîgît: Amed paytextê Kurdîstanî yo. Dewleta tirke nêwazena girseyî tewrê Newroze bibê. Verê ma de zaf zor û zehmetîyî est bîyî la şarê kurdî rixmê her çîyan xo resna warî. Cinî, dayîk, ciwan û domananê ma bi xoverdayîşî xo resna warê Newroze. Newroza emserîne sey serewedaritişî bîye.

Îlknure Ak: Wexto ke ma resayî warî 3-4 reyî kontrol bîyî. Pûşîyê ma yê kes û zerdî est bîyî, ê zî polîsan ma ra girewtî. Ma apey waşt la înan ma rê gefê destbendkerdişî wendî. 

Suleyman Bayram: Newroze de astengîyî zaf bîyî. Ma 10 de resayî warî la ancax 15 de ma eşkayî bikewê warî. Polîsan gazê îsotî eştî, xeylêk kesî destbend kerdî û merdiman rê teda kerde. Ma nêeşkayî pê kincanê herêmîyan debikewê warî. Seba ke înan kincê ma qedexe kerdî ez bi nimitkî kincê xo berdî.

Alî Kandemîr: Newroza emserîne sey roşan û xoverdayîşî derbaz bîye. Ma astengî, zor û zehmetîyî wedaritî û şîyî warî. Rixmê astengîyan zî ma uca de bîyî û roşanê xo fîraz kerd.

Umît Yilmaz: Saete 19.30 de ma uca de bîyî. La heta 15.00 ma ameyî vindarnayene. Kes nêeşkeno Newroze ma ra bigêro. Ma heqaretan nêkenê, kerrayan nêerzenê la eke ê vera ma tirsanê xo berz bikerê hînî cewab do bêro dayene.