Bajarê Bologna yê Îtalya de 17ê adare de qerar amebi girewtene ke Hemwelatîya Rûmetî  bidîyo Rayber Apoyî. Hemwelatîya Rûmetî bi merasîmê taybetî teslîmê birarzayê Rayber Apoyî û Wekîlê DEM Partî  Omer Ocalanî bîye.

Qesra Accursioyî ya Bologna de aktîvîte ame organîzekerdene. Hemkara Şaredarî Emily Clancy, Sereka Meclîsê Şaredarî Maria Caterina Manca, Serekê Grûba Koalîsyonê Sîvîlî yê Meclîsê Şaredarî Detjon Begaj û endamê meclîsî û Endama TJK-E Zîlane Dîyar û Buroyê Erformasyonî yê Kurdsîtanî ra Yilmaz Orkan tewrê merasîmî bîyî.

Verê merasî ke çapemenîya Îtalya zaf eleqa mojna ci, Omer Ocalanî cewab da persanê çapemenîye.

Merasîmî bi qiseykerdişê Maria Caterina Manca dest pêkerd. Manca bale ante tecrîdê serê Rayber Apoyî û ser qala têkoşîn û felsefeya ci kerd. Manca ard ziwan Hemwelatîya Rûmetî têna sembolîk nîya û vat no eynî wextî wayîrvejîyayîşê vengdayîşê 27ê sibate yê Rayber Apoyî yo.

Hemkara Şaredarî Emily Clancy zî vat Rayber Apo têna semedê Kurdîstanî ney vera heme problemanê komelkî bi felsefeya konfederalîzmê demokratîkî rayîrê çareserîye ramojneno. Clancy vat wayîrvejîyayîşê Rayber Apoyî vervejîyayîşê zûlmî yo.

Omer Ocalan zî nê vatî: ''Îtalya gerek sey welatê demokratîkî paştî bido têkoşînê şarê kurdî yê semedê çareserîya meseleya kurdan. Îtalya û Ewropa gerek paştî bidê têkoşînê demokrasîyî yê kurdan. Pêkewtişê Rojhelatê Mîyanênî tesîrê Ewropa zî kenê. Coka haştîye hewce kena û gerek Îtalya û Ewropa zî paştî bidê prosesê haştîye.''

Badê qiseykerdişan Hemwelatîya Rûmetî ke dîyaye Rayber Apoyî teslîmê birarzayê ci Omer Ocalanî bîye.

Îtalya de hata nika 20î ra zafêr şaredarîyan hemwelatîya rometî/fahrî daye Rayber Apoyî. Mîyanê nê şaredarîyan de Palermo, Napoli, Palagonia, Reggio Emilia, Riace, Martano, Pinerolo, Castel de Giudice, Castel Bottaccio, Berceto, Cinquefrondi, Fossalto zî ca genê.