Dîrektor û kaykerdoxê sînema Ganî Ruzgar Şavatayî derheqê embazê xo Sirri Sureyya Onderî de ANFyî rê qisey kerd.

Şavatayî da zanayene ke 35 serran ra nata ey Onder şinasnayêne û vat: ‘’Ez Meletî ra ya, Sirri zî Semsûrî ra yo. Ma sînema musnaye ey, ey zî sîyaset musna ma. La mezg, fikr û qelema ey verê ma pêroyînan de bîyî. O serkêş bi, haştîwaz bi, edîl bi.’’
Şavatayî vat ke Onder maneno Kawayê Asinkerî û vat: ‘’Meşaleya haştîye bi Sirriyî geş bîye. Ey tim haştîyêka rûmetêne waştêne. Sirri meşaleya adirê Newroze bi, cesaretê Kawayê Asinkerî bi. O şerwanê haştîye bi. Ey tim yarîyî kerdêne. Ez di serrî ey ra pîlêr a. Sirriyî tim mi rê vatêne ‘Ez do fîlmê xo bigêra. La şertê mi est o; ganî ti 120 serran biciwîyî.’ 

Xatirwaştişêko zaf rew bi, ez nêeşkena qebul bikera. Ey tim seba haştîye xîret kerd. Erkê caardişê haştîye hinî milê ma pêroyînan de yo. No erk milê şaran û ciwanan de yo. Sirriyî waştêne ke derheqê Meclîsî de fîlmêkî bianco. Ma do nê waştişê ey bîyarê ca. Hewn û xeyalê ey do nêmcet nêmanê. Ez do seba yadkerdişê Sirriyî fîlmêkî bianca. Ma do wayîrê vîrameyîşê ey vejîyê û hêvîya haştîye biresnê her cayî.’’