Şebekeyanê paramîleteran ê îqtîdarê AKP-MHPyî ra yew 'Osmanli Dîrîlîş Halk Harekati' o ke endamêkê ci îtîraf kerd ke ê pêro şaristanan de pê çekan xo rêxistin kenê.

Nê şebekeyê ke xeyalê Osmanîyan kenê, hûmara înan Vakurê Kurdîstanî û Tirkîya de vera zêdîyena. 'Osmanli Dîrîlîş Halk Harekati' zî nê şebekeyan ra yew o û Bursa de 2017 de hetê bazirganêkê bi nameyê Turabî Ergunî ra ronîyaya.

Turabî Erguno ke seke kopyayêkê Erdoganî yo pê pawitoxan û wesayîtanê zirxînan gêreno. Ergun nameyê Erdoganî ser o gefan waneno.

'Osmanli Dîrîlîş Halk Harekati' bi taybetî medyaya dîjîtale ser o kesanê ke Erdoganî rexne kenê pê kiştişî tehdît keno.

Reyna çeka ke wextê îşxalê Efrînî de şuxilîyaya ser de îmzaya Ergunî est a. Ergunî youtube ser de serê îşxalê Efrînî şîîrêke wende û bi nê hawayî dişmenîya vera kurdan û nîjadperestîya xo zî eşkera kerda.

Mîyanê 'Osmanli Dîrîlîş Halk Harekati' de kurdî zî est ê ke nînan ra yew zî Y.A. yo. Y.A. îtîraf keno ke Osmanli Dîrîlîş Halk Harekati 13 hezar kesan ra yeno pê û nê kesî perwerdeyê çekan gênê. Y.A. vat: ''Mîyanê ronayoxanê şebeke de leşker û polîsî est ê.''

Y.A. pare kerd ke xeylêk çekî binê erdî de yê, weçînayîşê 2023yî seba nînan zaf girîng o.