Şerwananê YPJ û Meclîsê Leşkerî yê Minbicî bale ante resnayîşê raştîyanê cepheyê xoverdayîşî ser û pare kerd ke Nazim Daştan û Cîhane Bîlgîn seba ke raştîyî resnayêne ameyê hedefkerdene.
Dormeyê Awbendê Tişrînî û Pirdê Qereqoxazî de xoverdayîş vera hêrişanê îşxalî yê dewleta tirke dewam keno. Kedkarê çapemenîya azade kenê ke raştîyanê şerî biresnê şarî. Rojnamegeran Nazim Daştan û Cîhane Bîlgîn seba ney xîret kerdêne ka ê netîceya hêrişê dewleta tirke de şehîd bîyî.
Şerwananê YPJ û Meclîsê Leşkerî yê Minbicî derheqê babete de ajansê ma rê qisey kerd.
Şerwana YPJyî Zeynebe Zîlan ard ziwan ke ê bîyê şahîdê rojnamegerîya Nazim û Cîhane û vat: ''Wird rojnamegeran zî kedêka pîle dayêne ke raştîyan biresnê şarî. Dewleta tirke xîret kerdêne wina bimojna ke Awbendê Tişrînî û Pirdê Qereqozaxî kewtê destê înan. La Nazimî û Cîhane raştîyî resnayêne. Dişmenî seba ke raştîyan eşkera nêbê Nazim û Cîhane kerdî hedef. Ma nînan bi rêzî yad kenê.''
Şerwanê Meclîsê Leşkerî yê Minbicî Reşîd Serdarî vat: ''Cîhane û Daştanî seba ke raştîyanê şerî biresnê xebitîyayêne. La wirdî zî bîyê hedefê hêrişanê hewayî yê dewleta tirke. Dewleta tirke nêwazena ke raştîyan eşkera bibê coka rojnamegerî kerdî hedef. No hêriş sûcê şerî yo. Verê cû zî dewleta tirk rojnamegerî kerdibî hedef. Ma do tim wayîrê vîrameyîşê embazanê xo vejîyê û cewabê hêrişan bi xurtêrî bidê.''
