23yê kanûna 2022yî de paytextê Fransa Paris de Merkezê Kulturê Kurdan ê Ahmet Kayayî de Endama Konseya Rayberdişî ya KCKyî Evîne Goyî, Hunermend Mîr Perwer û Abdurrahman Kizil ameyî qetilkerdene.  Sergêra qirkerdişî de serkêşîya Têgêrayîşê Cinîyan ê Kurdan ê Ewropa (TJK-E) aktîvîteyanê vîrardişî dest pêkerd.

Kurdîstanijî û dostê înan ke verê Merkezê Kulturê Kurdan, cayê qirkerdişî de ameyî têhet bi slogananê  "Şehid namirin" û "jin jîyan azadî" qîrayî. Aktîvîteya vîrardişî seata qewimîyayîşê qirkerdişî de bi rêzgirewtişî dest pêkerd.

Dîlane Amed ke bi nameyê TJK-E qisey kerd, wina persayî, ''Kiştoxî bewlî yê dewleta Fransa qey bêveng a.'' Amede ard ziwan ke qerarê qirkerdişî hetê dewleta tirke ra ame dayene û veng da Frasa û wina vat: ''Eke Fransa nêwazena biba hemkara nê şerê leyminî yê dewleta tirke ganî nê qirkerdişî safî bikera.''

Dîlane Amed nê vatî: ''Dewleta tirke seba ke têkoşînê kurdan çîn bikero qirkerdişan kena. Coka hêrişê Rojawanî kena. Tecrîdê serê Rayber Apoyî xorîn kena. Ma tîya ra reyna selamanê Rayber Apoyî genê. Ma do bi nê selaman têkoşînê xo xurtêr bikerê. Heta azadîya Rayber Apoyî têkoşînê ma do dewam bikero.''

Merdimanê şehîdanê Parisî zî vîrardişa de qisey û vat ê do wayîrê têkoşînê şehîdan bivejê.

Hemsereka KCDK-E Zubeyde Zumrut zî wina vat: ''Sakine Cansiz ma rê mîraso şorişgêr verda, Evîne zî ma rê sîstemê Rojawanî verda. Ma do wayîrê mîrasê înan bivejê. Evîne bi têkoşînê xo yê vera DAÎŞî Ewropa pawit  la dewleta Fransa Evîne nêpawit. Fransa kiştoxan rê çimê xo girewtî. Heta azadîye Rayber Apoyî û çareserkerdişê meseleya kurdan têkoşînê ma do dewam bikero.''

Aktîvîteya vîrardişî bi deyîranê Meyzen Agitî dewam kerde. Saete 18:00 bi tewrbîyayîşê dostanê kurdan do aktîvîteya vîrardişî dewam bikera.