Sêrkeşîya Komeleya Kulturî ya Pîr Sultan Abadalî  (PSAKD) de  şar, rêxitinê komelê sîvîlî û partîyê ke ameyî têhet  serrgêra 28. ya Qirkerdişê Sêwasî de aktîvîteyêke organîze kerde.

Şaro ke vizêr bi desan bajaran ra ver bi Sêwas kewt rayîr verê şubeyê PSAKDyî de ame têhet. Parlamenterê HDPyî û tamsîlkarê rêxistinanê êlewîyan û dezgehanê sîvîlan zî tewrê ci bîyî. Bi hezaran kesan ver bi Otela Madimakî rayraşîyîş kerd û bi sloganan edalet waşt. Şaro ke binê ablûqaya polîsan de ame verê otele tîya vilikî û fotografê kesanê ke ameyî qetilkerdene nayî ro.

 Vervatoxa Partîye ya HDPyî Ebru Gunaya ke tîya qisey kerd nê vatî: ''Çi heyf ke 28 serrî ravêrtî la hema zî kiştoxan hesab nêdayo. Îqtîdar kiştoxan paweno. Seba ke kiştoxî nînê cezkerdene qirkerdişî zêdîyenê. Tewr peynî de zî Îzmîr de Denîze Poyraz ameye kiştene. Ma kiştoxan hole nas kenê ke hetê mafya-çete-dewlete ra yenê pawitene. Zîhnîyeto qirker hema serê karî de yo. Avûkatê qirkerdişî partîya îqtîdarî de yê. Hema zî banê elewîyan yenê nîşankerdene. Elewîyî binê tehluke de yê. Ma sey HDPyî pîya bi rêxistinanê elewîyan vera nê qirkerdişan têkoşîn kenê. Ma reyna şehîdanê xo yad kenê, dejê keyeyanê înan pare kenê û vanê ke heta hesabdayîşê kiştoxan têkoşînê ma do dewam bikero.''

Hemserekê Federasyonê Komeleyanê Elewî Bektaşî Huseyîn Guzelgulî zî vist vîrî ke herinda cezakerdişê kiştoxan de  qirkerdişî zêdîyenê û vat: ''28ê serrî verê cu tîya qirkerdişo tewr tarî ame kerdene. Merkezê zanîst, huner, şîîre û deyîran vêşna. Dejê ma sey roja verêne yo. Ma Sêwas xo vîr a nêkerd, do mekerê. Ma sond wend ke ma do edaletî bîyarê Sêwasê gonînî.''

Hemsrekê Pêroyî yê PSAKDî Ganî Kaplanî zî bale ante ser ke seba ke engişta dewlete qirkerdişî de esta edaletî nêno caardene û vat: ''Pêyê Qirkerdişê Sêwasî de dewlete bi xo esta.''

Merdimanê şehîdan zî waşt wa kiştoxî bêrê cezakerdene. Badê qiseykerdişan pê semahî aktîvîte qedîyaye.