Vizêr qezaya Hezexî ya Şirnexî de polîsan eşt keyeyê Şenî ser û dadîya Hemşaredarê Hezexî Murad Şenî yo ke herinda ci de qeyûm ame wezîfedarkerdene, Fatime Şen û Abdurrahîm Şen derb kerdî û birayê Murad Şenî Nurettîn Şen zî binê hewayê serdî de nêm saetan teber de vindarna. Abdurrahîm Şen û Fatime Şen nêweşxaneyê ra raporê derbî bigêrê ke gerreyê polîsan bikerê.

Hemşaredar Murat Şenî vera na rewşe nêrazîbîyayîşê xo mojna û vat: ''Polîsan keye de zulm kerd. Polîsan dadîya mi ra waşt ke berê sindoqêke abikera. Dima ke polîsan zereyê sindoqî de çîyêk nêdî înan berê sindoqî destê dadîya mi ser o pada. No nêno qebulkerdene. Ê tersenî û no ters do bibo peynîya înan. No şer qet vera înan de çok nêşi erdî ro. Dadîya min a 90 serre zî çok nêşîye erdî ro û do nêşora.''

Şenî îfade kerd ke dewlete wazena keyeyê ci bitersna û vat: ''No ters do bibo peynîya înan. Vizêr Wan de torosê sipîyî ewro Hezex de kesê ke dadîya mi birîndar kerde huqûqê na dewlete qebul nêkenê. Ma do peyê înan nêverdê. Ê do hesabê naye bidê.''

Şenî da zanayene ke kekê ci zî wextê sereştişî de nêm saetan teber de ame vindertene û cîranê ci zî hetê polîsan ra ameyî gefwendene. Şenî eşkera kerd ke ê do gerreyê polîsan bikerê.