Keyeyê Şenyaşarî verî têna qezaya Pirsûsî ya Riha de şinasîyayêne la nika pê dewaya xo ya edaletî pêro dinya de şinasîyeno û bi sembolê edaletî.

14ê hezîrana 2018 de hîrê ferdê keyeyê Şenyaşarî hetê merdim û pawitoxanê Wekîlê AKPyî Îbrahîm Halîl Yildizî ra kişîyayî. Emîne û Ferît Şenyaşarî seba ke kiştoxî bêrê muhakemekerdene û Fadil Şenyaşar zîndanî ra vejîyo 9ê adara 2021î ra nata verê Edlîyeya Riha de Nobeta Edaletî kenê.

Nobeta Edaletî ya Emîne û Ferît Şenyaşarî siba kewena roja 600. Ferît Şenyaşarî bi na wesîle ajansê ma rê qisey kerd.

Ferît Şenyaşarî ard ziwan ke Tirkîya de edalet çin o û qirkerdişo ke vera înan ameyo kerdene zî îsbatê ney o. Şenyaşarî vat: ''Ma têna edaletî wazenê. Coka êyê wayîrwijdanî wayîrê têkoşînê ma vejîyenê. Bi nê wayîrvejîyayîşî ma dinya de vengê xo da eşnawitene. Ma tîya de çîyêkê anormalî nêkenê. Ma raştê qirkerdişî ameyî, 3 merdimê ma ameyî qetilkerdene, birayêkê mi bi şansî xelisîya la o zî bi hawayêkê neheqî tepişîya. Ma nê zulmî qebul nêkerd û nêwaşt keyeyê xo de ronişê.

Ma heqê xo yo ke qanûnê bingeyîy da şuxilna verê Edlîyeya Riha de dest pê nobeta edaletî kerd. Ma çewî rê heqaret nêkerd. Seba ke o mêrik wekîlê AKPyî yo verê edlîye de çîyêk nêverda ard ma ser. Ma 5 reyî ameyî destbendkerdene, 24 saetan ez û dadîya mi ma nezaret de mendî. 3 reyî cezaya pereyî dîyaye ma, 4 reyî dest nîya pankarta ma ya edaletî ser. Xeylêk reyî ma verê edlîye de şîdet dî. 20 reyî ma kewtî verê tehqîqatî. Dozger û dadgerî hol zanenê ke kamî no qirkerdiş kerdo. Ê kenê ke ma aciz bibê û şorê. Dosyaya qirkerdişê nêweşxaneyî 4 serran û 4 mengan ra dima vurîyaye bîye gerrename la Wekîl Yildizî qetî nêame sûcdakerdene û mehkeme edîl tênêgêraye.''

Ferît Şenyaşarî peynî de vat: ''Wexto ke ma dest pê nê têkoşînî kerd ma texmîn nêkerd ke proses hende beno derg. Vanê 'cografyaya merdimî qederê ci yo.' Na cografya de tim zulm yeno kerdene. Verê çimanê merdiman de ma zulm dî û ma vera nê zulmî xo ver danê. Tirkîya de edalet çin o. Mehkeme bi hawayêkê edîlî tênêgêrena. Edalet seba her kesî lazim o. Ez venga her kesî dana ke paştî bido ma û têkoşînî pîlêr bikero.''