Şenyaşaran cewab da îdîaya 'bazarîye': Ma têna edaletî wazenê

Keyeyê Şenyaşarî Nobeta Edaletî de cewab da îdîya rojnameger Bariş Terkogluyî ke vatêne Keyeyê Şenyaşarî Merkezê Pêroyî yê AKPyî de tay pêvînayîşî kerdê.

Emîne Şenyaşar û Ferît Şenyaşar roja 465. de, verê Edlîyeya Riha de Nobeta Edaletî rê dewam kenê. Keyeyê Şenyaşarî Nobeta Edaletî de cewab da îdîya rojnameger Bariş Terkogluyî ke vatêne Keyeyê Şenyaşarî Merkezê Pêroyî yê AKPyî de tay pêvînayîşî kerdê.

Ferît Şenyaşarî da zanayene ke înan Anqara de Meclîs de MHPyî ra ber pêro partîyanê sîyasîyan de seba edaletî pêvînayîş kerdo. Ferît Şenyaşarî eşkera kerd ke birayê ci Fadil Şenyaşaro ke 4 serrî yo hucreyê yewkesî de tepişîyeno qetî babeta 'bazarîye' nîyo.

Ferît Şenyaşarî vat: ''Birayê mi hetê huqûqê serdestan ra 4 serrî yo tepişîyeno. O ganî çarçewa pawitişê xo de biameyêne muhakemekerdene. Eke edalet bêro caardene birayê mi vera dîyeno. Tay rojnamegeran derheqê ma de îdîayî vetî werte. Ma her kesî de pêvînayîş kenê. Waştişê ma huqûqî yê. Ez venga dezgehê hukmî, selahîyetdaran û her kesî dana ke ma sey qurbanî ameyî weçînayene. Wa hînî edalet bêro caardene û birayê mi vera bidîyo.''