14ê hezîrana 2018î de qezaya Pirsûsî ya Riha de hetê merdimanê Wekîlê AKPyî Îbrahîm Halîl Yildizî ra hîrê ferdê keyeyê Şenyaşarî ameybî qetilkerdene. Keyeyê Şenyaşarî roja 793. de Nobeta Edaletî rê dewam keno. Emîne Şenyaşar nêweşîyanê xo ra nêeşkaye ewro tewra nobete biba la Ferît Şenyaşar verê Edlîyeya Riha de nobete rê dewam keno.

Keyeyê Şenyaşarî hesabê xo yê medyaya dîjîtale ra no mesaj da: ''Edaleto ke erey bêro edalet nîyo. Muhakemekerdişê dewleta tirke hende faîlan sûcdar o. Seba atmosferê haştîyaneyî ganî mekanîzmaya edaletî hîna bi lez û edîlî bixebita. Heta edalet bêro têkoşînê ma do dewam bikero.''