Çalakîya Nobeta Edaletî ya keyeyê Şenyaşarî roja 618. de zî verê Edlîyeya Riha de dewam kena. Ferît Şenyaşar û Emîne Şenyaşar verê edlîye de yê.

Ferît Şenyaşarî nobete de qisey kerd û pare kerd ke ê bi israrî nobete rê dewam bikerê û vat: ''Keyeyê dadîyêke şîyayo ra. Mêrde û di lajê ci kişîyayî, yew lajê ci zîndan de, hucreyê yewkesî de yo. Na dadîye senî nê zulmî qebul bikera, şora keye de seke çîyêk nêbîyo cuya xo rê dewam bikera? Na dadîye têna edaletî wazena. Gunayê aye milê her kesî de yo. Ma heqê xo dewlete rê helal nêkenê.''